Udhampur amakba nung Pakistan maden: Pakistan Foreign Office

 

New Delhi, August 06 (Agencies): Yashi Jammu & Kashmir nung kiralongrartemi Udhampur nung BSF sepaitem amakba sülen pua aliba kiralongrar Naved Usman-i parnok Pakistan nungi lir ta shiogo saka, Pakistan-ibo kiralongrartemi Udhampur amakba nungji parnok maden ta tanü metetdaktsüogo.

Sangdong ka ajanga Pakistan Foreign Office otongdar, Syed Qazi Khalilullah-i, India nungeri tai tongloktsübaji tamentaktak maka, pua alisangji Pakistan nungi ta India-i tama kuli agütsütsüla, ta ashi.

Syed-isa, item ama tai maneni tongloktsüba ya anentsüla ta parnoki India dang shijen ashir, ta ashi.

Yashi Udhampur anasa Narsoo Nallah nung aliba Jammu-Srinagar highway nung kiralongrartemi BSF sepaitem amakba mapang kiralongrar ka kahset aser ka taküm puogo.

Tang pua alisang dang asüngdangyaba mapang pai, pa Pakistan, Faisalabad, Ghulam Mohammadabad nungi Naved lir ta ashi.

BSF sepaitemi kahsetsangji Pakistan, Bhawalpur nungi Momin Khan lir ta Naved-isa shiogo.

Yashi kiralongrartemi BSF sepai amakba mapang nungji sepai ana kahset aser 11 tashi yirutsü.

Javed-isa, “Hindu nunger tepsettsü atema ni aru. Mapang ajak nung Kashmiri nungertembo tepseter,” ta ashi.

“Ni Pakistan nungi lir aser kahtepba mapang kü tembar asü saka nibo jentet. Iba ya inyakba nung jangratem lir,” ta Naved-i shia liasü.

Bodhbar nü India-i Pakistan nungi kiralongrar Javed puogo ta sangdongba sülen anogo ka lir tanü Pakistan Foreign office ajanga paji Pakistan nunger ta sangdongba kuliji tama agütsütsüla ta shiogo.