1 buba Kings Summer Challenge Volleyball asayamong tenzükogo

Dimapur, July 09 (TYO): Kings Welfare Society (KWS) teloki ‘Exploring talents’ omen nung ajemdaker anogo 3 agia asayatsü ayongba 1 buba Kings Summer Challenge Volleyball asayamong tanü Brehostibar nü nungi tenzüka Dimapur State Stadium nung asayatsü tenzükogo.
Tanü asayamong lapokba sentong nung Ao Lanur Telungjem Dimapur nung Tir, Longri Imchen tongti tesemdanger liasü.
“Tsüngremi Naga nunger nem saisapongtsü sempet tajung agüja lir saka saisapongtsü den sentakba ki o jen junga renema maliba yong lanurtemi aiben tanga memeneptsüsa akümer,” ta Imchen-i tanü sentong nung metetdaktsü.
Tanü putu nung asayartemi saisapongba ajanga pei tepok mesütettsüsa sen peria aazükteter anungji, lanurtemi temulungtetba tulu yur saisapongtsü sabang nung tamaba jenjang angutsü merangtsüla ta pai ajungshia ashi.
Tan asayamong nung shilem agir telok 8 telok ana küma sadangtsür külen parnoki league yimya nung asayatsü tenzükogo.
Tan Honibar nü final asayatsü renemba asayamong nung mezüngbuba jenjang anguba telok nem takok marok aser kuli kaket den külemi, senpet sen 50,000 renemja lir.
Tanabuba jenjang angur nema tanabuba jenjang takok marok aser kuli kaket den külemi, senpet sen 30,000 agütsütsü renema lir.
Semifinal nung shilem agitsü jenjang ngutetba telok shia nem senpet sen 3000 agütsütsü renemba den külemi, best player, best libero, best spiker, best setter aser best disciplined team sempeta agütsütsü renemogo.