10-Northern Angami-I aser 8th Western Angami nung common platform agi

Kohima, Tsüklai 17 (TYO): Kohima nung tanü 10-Northern Angami-I aser 8 Western Angami Assembly constituency tem nung candidate tem atema common platform sentongtem ayongzüka agi.
Kohima Village Council-i Ziekezou, KVSA ground nung 10-Northern Angami-I constituency atema aser külen 8-Western Urban Panchayats Union-i APO Hall nung 8 Western Angami Assembly constituency atema common platform sentongtem ayongzüka liasü.
10-Northern Angami-I constituency nungi NPF candidate Khriehu Liezietsu aser NDPP candidate Dr Kekhrie Yhome na tokteper.
Sentong nung Khriehu-i o jembidang 2013 election nung constituency nung alirtemi pa nem takok ngudaktsüba atema pelaba metetdaktsü.
Khriehu-isa pai inyakba mapatem indang osang metetdaktsü aser ano inyaktsü aliba mapatong kar lemsatep.
Constituency nung alirtemi tanaben takok ngudaktsüra pai nendaka aser tanen makai constituency aser state atema inyaktsü ta Khriehu-isa nangzük.
Kekhrie Yhome-ia o jembidang NDPP indang omen “O masü saka mapa” nung ajemdaker inyaktsü nangzük.
Khriehu-i tebu atema menden yutsüba sülen iba constituency nung 2017 küm by-election agi aser iba mapang Yhome-i mezüng atema Independent candidate ka ama toktep saka takok mangu.
“Election nüboyimdang yimsüsürtemi aika nangzüker saka mapa küma meinyakba atema nisungtemi parnok dak temulung malemer. Nagaland indang annual budget ji Rs 18000 crore dak tema lir aser iba nung project aser terenlok mapa inyaktsü indang senotsü peria lir. Ni public tsüngdang iba indang booklet ka adoka sayutsü aser iba jagi nübortemi senotsü koma amshir’ar metettsü” ta Yhome-isa ashi.
Ano külen, 8-Western Angami A/C atema agiba common platform nung NPF candidate Kenizakho Nakhro-i o jembidang, pai nübortem atema bendanga agüja inyaktsü ta nangzük.
Kaketshirtemi school züngtor toktsüba aser mapa manguba khuret atema tebilemtsü bena jembidang Nakhro-i lanurtem training aser skill development sentongtem den sendakteptsü ta ashi.
Paisa tetsür tashi itdaktsütsü atema temulung agütsütsü aser scheme balala nung tangutsüpurtem atongtsüsa mapa inyaktsü ta nangzük.
Iba constituency nungi NDPP candidate Kevisekho Kruse-ia o jembidang, NDPP-i taruba election nung mangdang tasen den candidate tasentem ajanga tokteptsü ta ashi.
Tanü Naga loktiliba nung tensa mejungi akümba ngua pa temulung raksar aser iba nung temelenshi ka bener arutsü tangatetba nung pai election nung tokteptsü mulungtet ta Kruse-i ashi.
Tatemsa, NPP candidate aser taoba MLA, Asu Keyho-ia o jembidang, “taruba Nagaland state sorkar nung NPP adentsü aser ni takok ngura, sorkar nung adentsü aser cabinet menden angutsü” ta ashi.
Keyho-isa constituency nung alirtem atema inyaktsü aser urban development ministry o poverty alleviation ministry tem den osang metetpela welfare scheme balala nungi teyari agidaktsütsü ta ashi.

You must be logged in to post a comment Login