2017 Batch IAS Officer 18-i district ketdangsertem ajuru

2017 Batch IAS Officer 18-i district ketdangsertem ajuru

Aenjeti 13, 2018 nü Dimapur Deputy Commissioner’s Conference hall nung Dimapur DC, Sushil Kumar Patel, Commissioner Police Dimapur, Limasunep aser district ketdangsertemi 2017 batch IAS Officers den külemi tangokba noksa nung angur. 

Dimapur, Aenjeti (January) 13 (TYO): Bharat Dharshan (Winter Study Tour) dak sendakba nung 2017 batch IAS officers 18 Aenjeti 11, 2018 nü Dimapur, Nagaland tonga aruogo.
Tanü DC Office Conference Hall nung IAS officer tem jagi Dimapur Deputy Commissioner, Sushil Kumar Patel, Commissioner Police Dimapur, Limasunep aser tanga district officers den mensem ka mena shisalemsatepa liasü.
Iba sentong nung CP Dimapur-i, tang Dimapur district tensa indang metetdakja, tang district nung raraba tensa ajema kümogo aser tesünep nung lir, ta metetdaktsü.
“Naga nungeri tesünep putu ka aginer,” ta pai ashi.
Assistant Director, Food & Civil supplies Department, Jamonger-ia lanur officer tem dang scheme balala benoka inyakba aser National Food Security Act kübok tajangzük angutsüpurtem nem jang agütsüba osang metetdaktsü.
Kasa senden nung CMO Dimapur, Dr.Vikato aser social welfare den DRDA Dimapur nungi ketdangsertemia shilem agia jembia liasü.
Dimapur DC-i IAS officers tem dang kanga nendaka inyaktsü ajungshiba den külemi nüburtemi lanur aser ochishir ketdangsertem aginer, ta metetdaktsü.
IAS Officers study tour tatembangsüa parnoki Kohima-i tua Kisama aser World War II cemetery densema tongtibang tesemtem semdangtsü.

You must be logged in to post a comment Login