2017 küm Khristmas benjung mungertem dangi

– K. Imliyanger Jamir, Eralibill, Dimapur.

Yisuji Khrista;
Yisuji tematiba putir,
Aji zülua lir.
Nai ratar asü?
Rataa lira Yisu bushidi arung,
Küm meyi ana dak tali süiogo;
Bethlehem temenen tsüng nung,
Khonung sannükertem jembitep;
Bethlehemi odi arung;
Santem moapu nung toktsür;
Bethlehemi Yisu bushi ao, aser angu.
Yisu ngur parnok kanga pelatep;
Yisu ngur pelabaji khenyongi tepela balaka liasü.

Yisu bushidang timtem tekangshi ajurur;
Yisu bushidang ali mapatem toktsür;
Yisu bushidang mezüngmeshi aser tatalatsüba,
Yisu bushidang taremzük aser ajemalu,
Yisu bushidang nüktzü yima pei Kangki apur,
Saka Yisu angudang tepela balaka,
Nai-a züngdangogo ma?
Mashi malu sannükertemi Yisu ngur pelatep;
Ibaji na asü?
Yisu ngur pelaseta alirtem koda tepelatsü.

Herod ama,
Nai anemsü agi Yisu bushira mangutsü,
Petinu tetuyuba ama,
Tashitemetetertemi Yisu bushi aser angu;
Parnoki oset asem agütsü,
Item osetji Yisu taküm den –
Medemdanga agütsü,
Sannükertemi kodang Yisu ajurur,
Parnok den Tsüngremer tejembiba liasü,
Anungji parnok Herod chuba dangi mao,
Pei lenmangi ao.

Nai Yisu majuru tashi,
Aser Tsüngremer tejembiba meteta;
Aser Pa sülen pei Kangki apur –
Pei sasa azüoka manidak tashi,
Anemsü agi Yisu bushirji na asütsü,
Tashi temetetertemi Tsüngremer temoatsü ngua,
Amanga Yisu bushi nung parnoki angu.

Na tashi temeteter ka;
Nai amangba ama Yisu nguogo ma?
Na mashi malur ka,
Sannükertemi Yisu anguba ama,
Nai Yisu nguogo ma?
Sannükertem dak tesangwa yaloktsüdang,
Parnok kanga tsübu,
Temenen pur dak –
Tsüngrem ain sentsüwangshi tesangwa –
Yaloktsüdang tsübur,
Naia züngdangogo ma?
Tsüngremer ain sentsüwangshi tesangwa –
Ne dak meyaloktsü tashi,
Na amang nung nemzüdagi.

Mary-i tatalokbatem ajak,
Pei mulung nung rizünga ayu ama,
Ne taküm nung Tsüngremer tanelai-
Koma jembia aru, aser jembir,
Itemji ne mulungjang nung rizünga lir ma?
Aser item dangji nai maneni kuli südar ma?
Nai kuli süra,
Na Kangki tsüngdang,
Tasü tati, tashi tait, tamanger ka lir.

Yisu tanaben arutsü tetuyuba agütsüogo,
Shiri pei tanela taküm aser temang –
Tai makai ajunga kümzüka ayur,
Itemji Khristmas benjung mungertem lir.
“Amen”