2017 MDFA : Tetsüng bolo asaya toktep – Lisopur ola-III

– N.M. Jamir, Advocate, Chairman,
Nagaland Indigenous People’s Forum.

Indian Olympic Football Team mezüng Captain Dr. T.Ao ( Dr. Talimeren Changki nunger) Ao lisopur nungi adok. Pa Guwahati yimti nung Cotton College nung Intermediate Science azüngdang nüngtugu Football Club MAHARANA CLUB nungi tetsüng bolo (football) asayaa liasü aser iba sülen pa temaba kaketshisatsü Calcutta nung azüngdang MOHAN BAGAN CLUB nungi 1943 küm nungi Calcutta Football League nung tetsüng bolo asayaa liasü.India nuchiso ngur külen pa mezüngbuba Indian Football Team Captain asütsü shimtet aser 1948 Summer Olympic London, United Kingdom nung asayaa liasü. Dr. T.Aoi aniba Indian Teami Burma ayongayonga akok saka tia maka France den asayadang goal 1- 2 agi Indian Team tsüka adok. Dr. T.Ao India tenüng nung International Football Tournament nung punguben tashi asayaa liasü.Dr.T.Aoi tetsüng bolo asayadang Striker, Defense aser Centre Half position nungsa asayaa liasü. Pa Defense position nung asayadang alima kintemi pa dang “The Great Wall of China” ta naroküm jatettsü, iba küli internet nung tejangja angutsü. Ni Law azüngdang Dimapur nung sodi amongdang 1996 küm par kidang (Amber Hotel, Golaghat Road, Dimapur) nung pa ajurutsü maongka angu. Pai otsü aika shia liasü aser nia senti shisatsü jenti aser temoatsü tulu angu.
Angazükba agi, Mokokchung District Football Association (MDFA) ajanga ayongzükba Ao lima nung tetsüng bolo asayaba tetoktepa ya 1993 küm nungi ayongzüka asayaa arudagi aser joko küm 24 (metsür pezü) ayongzüka asayadagi. Asen Aor ya tetsüng bolo asayatsü atema asoajen, nübo aser tashi (physical & stamina) peria dang keta aliba kin ka lir. Onok Govt. High School (dang Mayangnokcha GHSS ta ajar) nung azüngdang asen Aor Noktiba, Noksangba aser par purtemi tetsüng bolo asayaba kanga jangratemasa repranga liasü. 1993 küm nungi MDFA-i ayongzüka Ao lisopur tetsüng bolo asayaa aruba nungi tanü tashi nung tajangzükba kechi lir ? Dr.T.Aoi tangar lima Guawahati aser Calcutta yimti nungi tetsüng bolo asayaa mezüngbuba Indian Football Team Captain aküm. Guwahati yimti Nehru Stadium nung Dr.T.Ao indang noksa aika itaka yua lir aser item noksa temji nübortemi kanga sapua ketasena reprangteper. India nung nuügtugu COTTON COLLEGE, Guwahati nung Dr. T.Ao memeteter mali. Ano Sikkim linük koba linük nungi tanü India nung tetsüng bolo asayar mongien Bhaichung Bhutia adoka, par linuk nung Dr.T.Ao Football Tournament küm shia asayadagi. Ni shidangtsübo MDFA Tournament ya Dr. T.Ao memorial Tournament ta jateter asaya nunga kanga tapet asütsü aser iba ajanga asen Ao lisopurtem temoatsüa tulu angutsü sudi. Joko 1993 küm nungi asayaa aruba MDFA Tournament nübo junga tokaogo. Tanü tashi nung National player mesüra India nung nüngtugu Football Club nung asayar karbo adoka lir mali ? Odang mongpu ka amai dang asayaa amonger asü nükjidong koba tashi ka yur, iba Tournament ya ayongzüka asayar ! Tanü tensa saisapong (sports) ya alima nung industry tetsüdi ka lir. Ni 2004 küm Calcuttai State sorkar ken O ka agitsü atema tayimtsü nung aodang Assam nunger tetsüng bolo asayar ka den külemi amen, Kena otsü alongdang pai ashiba agi pa East Bengal Club nungi tetsüng bolo asayar aser ita nung sen 80,000/- angur ta shia liasü.
Shisadangdi arung !! India nunger Cricket asayar Sachin Tendulkar, Chess asayar V.Anand, Badmintion asayar Sania Mirza, Tennis asayar Leander Paes aser Mahesh Bhupati, parnok saisapong sempet ajanga koda alima nung nungtoko kümaogo. Sachin Tendulkarbo saisapong (cricket) nung mongin asübayong linuk temzüngi (Constitution) melaba ajanga Rajya Sabha MP tashi shimtetter Parliament nung dang temendak lir. Tanu alima nung sen timba ayangzükba industry temji Film, Entertainment aser Sports tem ya lir.
Joko asen Ao lisopuri shisadanger angatettsübaji MDFA asayaba mapang ojang rongrongshishia raratepdi aser District Administration ya MDFA asayaba ajanga ojang tekolak menüdaktsüdi. Ano MDFA ajanga nüngdak makaba ken O tem menatepa madoktepdi. Ni aibelener ka mesüra 2008 küm MDFA asayaba ajanga timtem adoka Gauhati High Court, Kohima Bench nung Ken O ka benoka liasü.
Arung !! asen Ao lisopurtem, asenoki tetsüng bolo koma, koda asayar iba yimya aser taremzük jakla nung asayatepdi (in sporting spirit and in consonance with World FIFA Rules). Iba ama tetsüng bolo asenoki asyatetra, Tsüngremer mapang tajung nung asen Ao lisopur rongnungi Dr. T.Ao mesüka tetsüng bolo asayar nüngtugu aser mongin adoktettsü teimla aser mangdang lir. Asen Aor dak tetsüng bolo asayatsü atema sempet aser tashi (talent & physical stamina) peria dang Tsüngremi moaja lir. Tanü lima tetsüng bolo asayar mongin tem Lionel Messi, Ronaldo, Roney, Podolski,Neymar nungertemi tetsüng bolo asyadang koda tetsüng bolo asayaba yimya tajung aser taremzük nung asayar, item jilu asen Ao lisopor asayartemi angazüktsü merangtsüla. Ano club aser pusemer temia (sponsor & fans) jaklaliro aser tangatetba tajung nung asayaba reprangtsüla.Tsüngremi asen Aor moajangma.