2018 general elections atema NPF renema lir: Dr Shurhozelie

Mon, September 13 (TYO): NPF party nung MLA kari party lenisüba anema nokdakba ajanga mepetmesü kar liaka, Naga People’s Front-i kobi melii 2018 General election manifestos adoktsü, ta Bodbarnü NPF President Dr Shurhozelie Liezietsu-i ashi.
Mon nung aliba Council Hall nung NPF Mon Division Rally nung jembidang pai iba osang metetdaktsü.
Party-i candidate tem shimtsü atema asalentong kar atongtsü aser party nungi anentsüba mesüra meindokba MLA tem den tokteptsü mapang mali. NPF-i taruba election atema renemer, ta Dr Shurhozelie-isa shisem.
NPF-i General elections nung party candidate asütsü atema lanur aser tetemjen lennirtem shimtsü aser tetsürtema shimtsü. NPF party-i ochimashir, mapang shia party melenertem aser tiyazü jembirtem meshimtsü, ta paisa metetdaktsü.
“Party züngsemtemi olulutem jembiba nung mamangtsüla kechiyong ochi-isa takok angutsü. Asenok tiyazü osangtem ajanga manishidaktsüla, saka taruba election atema temulung agüja mapa inyakdi” ta NPF President-isa tesentepertem ayongzük.
“Nagaland nung BJP renloka moutettsü ta Centre-i kanga junga meteta aliba ajanga, TR Zeliang, Neiphiu Rio aser Angh PB Acharya nunger miim tangatettep ka ayu. Parnoki ni aniba NPF sorkar atsüngdoktsü aser BJP den tesentaktep tajung aliba sorkar ka kümtettsü merang, saka NPF sorkar den BJP melokteptetba ajanga parnoki tasa tamajung atonga NPF party loksatsütsü meranger” ta Dr. Shurhozelie-isa ashi.
Tesüiba küm asem tashi TR Zeliang-i aniba sorkar alidang taoba Chief Minister Neiphiu Rio-i NPF-i aniba DAN sorkar meinpronga aru, saka tang NPF party raksatsütsü nükjidong nung pai TR Zeliang den longjemogo,
Küm aika NPF party-i TR Zeliang’er sorkar kümzüka aruogo. Parnok ama aakmesen maliba lennirtemi Naga nungeri magizüktsü. MLA 37 nungi parnok 22 bo party nung jendokogo aser 10 anenja lir. Parnok taruba election nung toktepnüra, parnok tajemdakdak bushitsüla kechiyong NPF-ibo parnok nem party tickets magütsütsü. Parnoki yimten tashi angutsü atema Eastern Naga nunger dang tiyazü osang aser olulutem prokshiogo saka nübortemi ibaji angateta lir, ta Dr. Shurhozelie-isa ashi.
Sentong nung DAN Chairman & NPF legislature party leader, Khuzholuzo Nienu (Azo) MLA-ia o jembidang, party mapa inyakertemi party tangatetba nung nokdakba atema pelar ta ashi.
Mapang shia party melenshiba MLA temi party tangatetba sülen manidak. Parnoki party workers ket nungi party rakzüka bener moutettsü, ta Azo-isa shisem.
Sentong nung MLA Tohanba, MLA P Longon, NPF Working President, Huskha Yepthomi, NPF Working President Apong Pongener, Ex Minister Kongam, ex MLA Asu Kheyho, NPF Kohima Division President Goneiu Sirie aser Mokokchung Division President, Moasangba Jamir nungeria o jembi.
Tanü agiba sentong nung mendenji Mon Division President, L Yanlong liasü, MLA Thonwang-i tesentepertem pela agizük aser MLA CL John-i anküp tepela o jembi.

You must be logged in to post a comment Login