2023 tashinung India nunger ajungai smartphone amshitsü: Amitabh Kant

New Delhi, Aenjeti 17 (Agencies): Küm pongu tsüngta India nunger ajunga ket nung smartphone alitsü, ta Niti Aayog Chief Executive, Amitabh Kant-i Rasemnü ashi.
Internet & Mobile Association of India (IAMAI) ajanga ayongzükba India Digital Summit ka nung jembiba mapang, linük nung smartphone amshir million 400 lir, ta Kant-i ashi.
“Tanü device shilem 85 mesendaktepi lir. Anungji Internet of Thing (IoT) space nung maongka tulu lir. Iba maongka ya 2025 tashinung sen billion $70 alitsü,” ta pai ashi.
Artificial Intelligence (AI) kisüngia sen billion $32 jenjang maongka agütsütsü, ta pai ashi.
“Advance robotics temi mapa shilem 25 inyaker. Iba ya aruya aliba küm tem nung shilem 45 akümtsü. Alima nung ita shi internet amshiba rongnung India ya temaba jenjang nung lir. Taruba küm ter tsüngta digital amshia senotsü tsütatepba ya trillion $100 ajungtsü,” ta Niti Aayog nung tekolakbai ashi.
Aadhaar shilem 99 yangluba aser Jan Dhan Yojana kübok bank account tem lapokba ya Fin-Tech industry atema nükla tajung ka liasü, ta pai ashi.
“Start-up community tsütsü reprangdangra, ‘Make in India’ sentong ajanga linük nung senotsü indang yimya melenshiogo. Linük nung start-up 4,000 lir aser 2020 tashi nung 12,000 ajungtsü,” ta Kant-i ashi aser FinTech sector nung start-pu 600 shi lir aser iba ajanga 2020 tashi nung maongka agütsüba ya sen billion $14 jenjang alitsü, ta shisem.
Tanü linük nung teinyaktsü tongtibangtibaji tajemtsü tzü tajung agütsütsü, kiojen yanglua flyover tem yanglutsüla, ta Kant-isa shisem.