23buba Classic Cup: New Market final-i iogo

Kohima, Novovember 18 (TYO): Taoba mapang nunga iba asayamung koker aliba telok New Market XI 23buba Classic Cup final-i iogo.
Tanü tanabuba semifinal asaya nung New Market XI puri St Joseph’s College, Jakhama goal 9-0 agi kokogo. Parnoki iba asayamung 1995 aser 1998 küm koka lir.
Hombarnü final asaya nung New Market pur iba asayamung asemben tashi atonga koker aliba telok Barak FC den 1:30 ako nungi asayatsü.
St Joseph puri asaya kanga junga tenzüka saka New Market-XI pur parnok dang nungi kanga agi tajungba telok ka asü, aser parnok Minute 16buba nungi goal achi tenzük. Mezüngbuba goal ya Kezhose-i idaktsü. Iba sülen minute trok dang lir Medoneituo Sekhose-i free kick tajungka metsüa tanabuba goal idaktsü. Maneni minute 33 aser 36buba nung Kezhose-isa par telok atema tasembuba aser pezübuba goal idakja hat-trick ka agütsüer asaya mezüngbuba shilem tembang.
Lemon break sülen New Market skipper Khwetelhi Thopi minute 50buba nung goal ka idaktsü, aser iba sülen penalty ka ajanga pa asoshi tanabuba goal idaktsü. Maneni minute 60 buba nung pai goal tasembuba idakja paia hat-trick ka agütsü. Iba ajanga St. Joseph’s College nungi asayar Tamting-i iba asayamung nung goal timtiba agütsür aliba den pa kasa kümogo, saka Thopi atema iba ya ajateta atutsü asoshi maongka lir. Asaya nung minute 73 or maneni Kezhose teyari ajanga Thopi-i pa asoshi goal pezübuba agütsü.
Minute 82buba nung Substitute aser Vekruto Resu-i goal tekububa idakja parnok asaya ayong ayonga kokogo.
Iba asaya nung St Joseph’s College defender Akiho nem yellow card ka agütsü.

You must be logged in to post a comment Login