23buba Classic Cup osang; Ziezou, Turaco, Naga Jaguars aser St Joseph’s College temi akok

Kohima, November 03 (TYO): Kohima Local Ground nung “Creating a better world through football” omen nung Classic Club ajanga ayongba 23buba Classic Cup football asayamung tananübuba nung Football Club Ziezou, Turaco FC, Naga Jaguars FC aser St Joseph’s College Jakhama telok temi pei tata asaya nung takok angu.
Hokulbarnü mezüng asaya nung FC Ziezou aser Megaton FC tsüngta asayaba nung telok katia goal kata magütsütet aser tie breaker nung FC Ziezou-i 3-1 agi Megaton FC madak takok angu.
Tanabuba asaya nung Turaco FC-i Midland Youth Organisation madak 4-0 agi akok. Iba asaya mezüng shilem nung Turaco telok nungi Maraiba-i mezüng goal agütsü aser kasa telok nungi Staiba-i minute 56buba nung goal ka agütsü. Turaco FC nungisa Napoleon-i minute 57 aser 59buba nung goal kaka agütsütet.
Naga Jaguars FC-ia Danger FC madak asaya asembuba nung 5-2 agi akok. Danger FC nungi Temjen Imchen-i asaya tenzüker minute 8buba nuung mezüng goal agütsütet saka Jaguars telok nungi Heno Lam aser Mehouzelie nati minute 17 aser 29buba nung goal kaka agütsütet.
Asaya tanabuba shilem nung Longjem-i Naga Jaguars asoshi minute 44buba nung goal ka agütsütet aser mapang talangka melie Danger FC nungi Bichamo-ia goal ka agütsütet.
Saka maneni Shamba Samson aser Dziiesedilhou nati goal kaka agütsüteta Naga Jaguars temi iba asaya koktet.
Hokulbarnü tatembang asaya nung St Joseph’s College Jakhama-i Cluster FC nem goal pezü agüja asaya tembang. St Joseph’s nungi Tamthing ya iba asayamung nung mezüngbuba hat-trick agiteter küma pai iba asaya nung minute 5, 8 aser 19buba nung goal kaka asütsü aser minute 51buba nung kasa telok nungi Katoho-i goal ga agütsütet. Cluster FC nungi asayartemi kanga meranga asaya, saka goal kata magütsüteti asaya tembang.
November 4 nung asayatsüpurtem:
Tyrants FC vs MT Youth Club @ 11:30AM
Highway FC vs Ethereal @ 1:00PM
Naga Terriers vs United Brothers FC @ 2:30PM