23buba Classic Cup: Tsiedi, Kezekevi, Chizami United & New Market-i kokogo

Kohima, November 7 (Agencies): Tsiedi Football Club, Kezekevi FC, Chizami United aser New Market XI puri tanga tasayadak 23buba Classic Cup nung tanü pei tata asaya koka taruba round tongtetogo. Iba asayamung ya Classic club puri “Creating a better world through football” omen nung ajemdaker Kohima nung ayongzüka asayadar.
Tanü asaya mezüngbuba nung Tsiedi FC puri Friendship United FC 4-1 agi kokogo. Asaya nung mezüngbuba goal Neilabeituo-i minute asem tsüngda nung indaktsü aser iba sülen minute 30 buba nung Khriebou-i tanabuba goal idakja asaya mezüng buba shilem tembang. Asaya tanabuba shilem tenzüker minute pongububa nung Friendship United pur asayar Khriezo-i goal ka idaktsü saka iba sülen Tsiedi puri maneni goal ana idaktsü. Ketsivilie-i minute 48buba nung tasembuba goal idaktsü aser Jacob-i goal pezübuba idakja minute 60 asayaba nungi parnok 4-1 agi akok.
Asaya tanabuba nung Kezekevi FC puri Botsa Students FC 5-1 agi akok. Kezekevi FC pur rongnungi mezüngbuba goal Kelenguto James-i minute 7buba nung idaktsü aser iba sülen Vitsopi Kin-i tanabuba goal minute 14 buba nung idaktsü. Botsa SU puria Dziesevilie ajanga minute 28buba nung goal ka idaktsü, ajisüaka lemon break sülen Kezekevi puri ano goal asem idaktsü. Theja Chuse-in minute 46 buba nung goal ka idaktsü aser iba sülen Vitsopi-i pa asoshi tanabuba aser par telok asoshi pezübuba goal minute 53buba nung idaktsü aser goal pongububa Mene Zasumo-i minute 60buba nung idaktsü.
Tanü asaya tasembuba nung FC Chizami United puri 4-0 agi Diki Warriors madak takok nguogo. Asaya mezüngbuba shilem nungbo telok kati danga goal magütsütet, saka asaya tanabuba shilem nung Wetshokho Tsuhah-i mezüngbuba goal minute 49buba nung idaktsü aser Wetshokho Thopi-i tanabuba aser tasembuba goal minute 57 aser 60 buba nung idaktsü, iba sülen goal pezübuba Tshezokho Rhakho-i mapang apuloktsür asayaba mapang nung idakja parnok asaya ayong ayonga kokogo.
Taoba mapang nung iba asayamung koker aliba telok New Market XI puri tanü asaya tatembangbuba nung Jakha FC 4-0 agi kokogo. Asaya nung mezüngbuba goal Vekhruto Resu minute ana tsüngda nung idaktsü aser 1-0 nung asaya mezüngbuba shilem tambang. Asaya tanabuba shilem nung Khwetelhi Thopi-i minute 52, 53 aser 56 buba nung goal asem atonga idakja pa iba asayamung nung hat-trick idaktsür asayar tasembuba kümogo.
November 8 nü asaya yamai alitsü:
1. St. Joseph’s College vs Cluster FC @ 11:30AM
2. Kohima Eagles SC vs Upper Bayavu FC @ 1:00PM
3. Barak FC vs Kohima College @ 2:30PM