3buba Capt. Kenguruse asayamung nung Naga FC aser Vanguard FC final-i iogo

Kohima, September 19 (TYO): Kohima nung tang tasayadak aliba 3buba Captain Kenguruse Memorial Football Tournament nung khen danga mezüdoki Naga Football Club ya final tongtetogo. September 21 anogo nikongdang 1:00 ako nungi Kohima Locel Ground nung Naga FC ya Vanguard Football Club den final asayatsü.
IGAR (North) kübok 9 Assam Rifles temi küm asem buba ayongzüka aruba iba football asayamung final nung Vanguard FC ya tang mezüngbuba asayatsü.
Mezüng semi final asayaba nung Naga FC-i Naga Terriers madak 2-1 agi akok.
Asaya tenzüker minute 31buba nung Naga FC nungi Khwetelhi Thopi-i mezüngbuba goal agütsü aser asaya tembang, saka tanabuba asaya tenzüker minute 73buba nung Naga Terries nungi T Khampai-i goal ka agütsütet. Saka asaya tembanger mapang apulokja asayadaktsüba mapang Rhitso Mero-i goal ka agütsüteta Naga FC ya iba asayamung final-i asembenbuba ai. Taoba mapang iba asayamung anaben tashi nung Naga FC ya champion lir.
Tanabuba semi final nung Vanguard FC-i Green FC ya 5-2 agi tsükdaktsü.
Asaya tenzüker minute 22buba nung Vanguard FC nungi Awangbou-i mezüngbuba goal agütsü aser iba sülen minute 39buba nung Yhunshalo-i tanabuba goal agüja mezüng asaya 2-0 nung tembang.
Tanabuba shilem asaya tenzüker Green Club-i goal ka agütsütettsü maongka angu saka Kimiyeto iba penalty magütsütet aser minute 58buba nung Chuba-i Vanguard FC atema tasembuba goal agütsütet.
Minute 67buba nung Vanguard telok nungi defender Sanyem Salym ya yellow card tanabuba mena aser asayadak moabu nungi togudaktsü. Iba sülen Green Club teloki kanga meranga asaya Kimiyeto-i minute 69buba aser 79buba nung goal kaka agütsütet.
Saka Vanguard telok nungi Chuba-i minute 79buba nung pa asoshi iba asaya nung tanabuba goal agütsüteta 4-2 aküm aser maneni Yhunsalo-ia spot kick nungi goal ka agütsüteta asaya tembang.