3buba Captain Neikezhakuo Kenguruse trophy tenzükogo

Kohima, September 13 (Agencies): Inspector General of Assam Rifles-North (IGAR-N)-i ayongzüka amongba 3buba Captain (Late) Neikezhakuo Kenguruse Memorial Football Tournament tanü Kohima local ground nung tenzükogo.
Iba asayamung nung telok 24-i shilem agitsü. District shia nungi telok anana aser Assam Rifles o Police team kaka ta alitsü. Iba asayamung ya September 21 nü tembangtsü. Iba asayamung ya Director General of Police L L Doungel aser asür Captain Kenguruse tebu Neisielie Kenguruse nati yimjung temaitsü guduru chioka lapoktsü. Iba sentong nung IGAR(N) Maj. Gen. Sanjay Gupta densema liasü.
Iba asayamung nung takoker nem senpet sen lakh 1.7 agütsütsü aser tanabuba jenjang nung takok angur nem sen 80,000 agütsütsü (telok anaprongla nem kuli kaket aser trophy agütsütsü) aser semi-final tongteta asayar telok anapronglanem sen meyirejang metsür pongungu agütsütsü. Tanga kicha sempet tem rongnung Player of the Tournament, Golden Boot, Golden Gloves densema lir aser iba den Best Disciplined Team nema sempet agütsütsü.
Asayamung tetenzük asaya nung iba asayamung anaben tashi koker aliba telok Naga Football Club puri Mon district nungi Nao-mei Football Club tsükdaktsüogo.
Asaya tenzüker mezüngbuba shilem nung telok anapronglai goal kata magütsütet, saka iba asayamung nung mezüng shilem agiba telok Nao-mei puri defending champion kanga ayongabo masayadaktsü. Ajisüaka asaya nung minute 59 or Khwetelhi Thopi-i goal ka agütsü aser asaya peyong nung iba goal kicha agütsüteta Naga Football Club puri akok.
Tsiese Basa ground nung tanga asaya ka nung Naga Terriers puri IGAR(N) 6-0 agi kokogo. Asaya nung minute 16 or Naga Terriers nungi asayar Khekiho Chishi-i goal agüja tenzük aser iba sülen maneni pa asoshi tanabuba aser par telok atema tasembuba goal pai minute 34buba nung idaktsü. T Khampai-i tanabuba goal minute 28buba nung idaktsü aser iba sülen Chingkamlong-i minute 34buba nung goal pezübuba, Medo Angami-i minute 67buba nung pongububa aser Kevi Richa-i minute 80buba nung goal 6buba, ta idaktsü.
September 14 nü asaya yamai alitsü:
Local Ground:
1. Tuli United FA vs Noklak FC @ 8am
2. DGP Kohima vs Vanguard FC @ 10am
Tsiese Basa Ground:
1. Pochury FC vs Youth Association Merangkong @ 7am
2. Surayin FC vs Green Club @ 9:30am
3. Laimcishm FC Zisaji XI Club @ 12Noon
4. Nine Zone Peren vs Friends United FC @ 2:30PM