63buba Kohima Village Sports Association Meet 2018

Kohima, Aenjeti 12 (TYO): Kohima Village Youth Organization ajanga ayongba 63buba Kohima Village Sports Association (KVSA) Meet 2018 ya Aenjeti 13 – 19, 2018 anogotem nung Khuochiezie Kohima Local Ground nung amungtsü.
“Iba asayamung ya North East nung tejentiba asayamung rongnung ka lir, koba 1945 küm tenzük,” ta KVYO Tir Medozhatuo Rutsa-i Rogonü osangbener den jembidang ashi.
“Ibai saisapong sentong ka kisüng masü, saka benjongmung ka lir, kong khel pezü – L. Khel, D. Khel, P. Khel aser T. Khel – ka küma longjemer,” ta pai shisem.
Iba sayamung lapokba sentong nung tila tanur aser lanur 1500 jungnüai shilem agitsü, ta tir-i metetdaktsü.
Iba asayamung lapokba sentong ya Kohima Village aser Kohima Local Ground nung Küpdoknü nungi tenzüktsü. 63buba KVSA Meet 2018 ya nikongdang 5:00 ako nungi Thevokemouzie, Kohima Village nung CRCKV pastor, Lhouvizhii Sachii-i moaja tenzüktsü aser iba sülen KVSA melin tsükloktsü.
Iba sentong ya Khuochiezie nung nikongdang 5:30 ako meta Kohima Village Council Chairman, Dr. Neiphi Kire-i tongti tesemdanger süa lapoktsütsü.
KVSA Meet 2018 lapokba sentong nung 63buba KVSA melin tsüklokba, choral presentations, drill display, special melodies, shadow act aser talent display amala shilem balala alitsü.
Iba asayamung nung Gold Medal 44 asoshi athletics, games (kilong aser kima), akhi tetsü tebu mapang nungi amshia aruba melangtepba amala asaya balala nung asayar nisung 400-i shilem agitsü, ta KVYO tatong tir, Dziivinguzo Mepfhüo-ia metetdaktsü.