6th September 1964 aser Tanü

– N. Kathang Longchar, Kichutip ward.

6th September anogo ya Aoer aser Naga nunger otsü nung mamatetba anogo ka. Tanü lanurtemi iba anogo ya kechiba mamatetba tongtipang anogo ta aikati asüngdangtsü südi, kechiaser iba anogo tejaklen Aoer aser Naga nunger yimmaker kübok kechi koma tensa tia ka nung liasü tanü alir 60% shi agi memetettsü. Kechiyong tanü Yimden , Mungdangtem aser Arogotem ajak nung ya 1964 sülen- ang soa yintetba lenir tem asütsü (1964-2017= 51 years) südi.
1st December 1963 Nagaland State akümba anogo ji a tashi -tawar dak alaka state akümba sülen tajangzük kechi nübortemi memetetba mapang . Ano 1997 Naga UGS(IM) teloki India government den yimjung yangluba ano 3rd August 2015 frame work agreement akaba item ya tajung , aji saka 1964 tejaklen nüchiso asoshi rarar aser nübor koba tia nung liasü meimchir tepang agi ashitsü makokba tensa tia nung lia aruba sülen Naga limai yimjung aruba anogo 6th September 1964. Ao limai kümtedtakba Yisu-a alua alitsü ama pelatep. Iba tensa mapang tashi nung Naga lima nung tanga kintema koma rishikangshi mesüra anisüngzük nung liasü kecha memetet mesüra mangashidangba mapang. Anungji yangi Aoer tim atemba indangang ashir.
Iba küm aser anogo tejakdang tuokrong aser reshikangshi majurudangba kibong Ao lima nung mali asü. (The worst situation in the history of Ao land) Indian army aser Assam police-e Naga nüjiso atema nokdaker atemer yimdak yimtsüng ajak nung teintet teburbo ajak pudena yimjak nung tetsür tanuri repranga lia kasetba, pei tashika piyong lenimao yareta lir arishi tempangtsusa zukreper doktsuba, yimjak nung tetsür dak mapa tamajung inyakba, oda tanü amai temetetba ali nungbo mapa tamajung inyaka liaji nok asangtsü koka liasu. Yamaji reshikangshiba den talidak ki ajak rongtoktsütsü ta asür ta tsüraburtem shisabulua jembitepba onokia meteta liasü. Yamaji amokmerena arur 1956 May ita nungi tenzüka talidak ki ajak rongtoktsü. Anungji kibong 3/4 yim tezü aliba jendang nung jentapba septeper alidang anogo eshika tsüngda nung tsük jentem nung aküm tilala yangluloker (make shift) septeper aliba aküm ajak rongtokja aru.
1964 tashi nung tenla ki (injung ki) dak alaka Ao lima nung süra aser azü ki dang liasu südi, anungji ozü yim arongdanga onoki ngua tayimtsü ka süi iba tayimtsu nungi kerosene tin ka tenla kilem nung ajongoktsür ali nungi sepoy temi mi senoktsü, saka tenla kijibo marong. Tanaben jen ronga arudangjia tekülemdak ki nungjibo mi masen.
Iba mapang tashi nung yimtsüng nung aliba kibongtem nung aliba tanur ajaki yaritepa aludang tululu ayim, aji oda takar tem jendang yim tsüngküm majung danga yimer ajak tizükteta tzük rizüngdena aliba ajak metsü küma rongtoktsü. Iba sülen (1957) sepoy camp aliba yimtsüngtem nung yim 4/5 grouping atenshidaktsü. Anungji alu yimzüka liaka yim ka nungi yim 4/5 ajanga alui aotsüba ji tamakoktsü, ano iba den yim 4/5 septeba aliba ajak ji tebensang (Arm) nung sepoy temi seal ajenerang yokerji iba seal majen madang parnoki mela aliba 4:00 pm nungbo yim tongseptsü ozüng liasüji teimba ka seal ajendak nungi meyiba aruadokli ta asü.
Alui aodangjia chitem bener meyok kechiba süra chitem ji arem nung alir (UGS) mesütsü bener aoer ta bilemba agi. Takar jendang rizünga akaba tsük ajak rongdokaba den alui-a sadema meyokji aluruwa mapang tsüraportem tsükdok shimer amai arem nung tsük tin 10/20 bendena taruba küm tanur kechi agi mesütsü ta nüksüyima aluru süidaktsü. Abenjagi 1957 nungi Ao lima nung aya wara sashia tenzük. Yim kar nungbo aya agi asüba liasü südi. Grouping mapangji tetsür dak alaka tebur tembo alui aotsü memela, kechiaser sungpo nungi shir tebur ajak anogoshia sepoy camp nung mapa inyakdaktsü (Force labour without wages). Nisung ka taküm nung mapang shidak nung chiyong peria achiba agidang anema alir saka rishikangshi, alaashi, shisabulu den chiyungtsü maka nungji aya wara sülen warashira agi tila tanur jendi asüba liasü. Item mapang nung asürtemji tanü yimten aser arogo nung lenir tajung asütsü sotetbatem-a alitsü shibai metet.
1964 tashi nung Ao lima nung aliba takotet yimsüsür aser pastor, missionary temi anir nütsüng nübur ajak sepoy aser Assam police ket achir tesa liasü. Ano yim rongdoker grouping sülen village guard (VGS) ta sür telok ka Ao lima nunga Aoer tem tesa, saka parnokjiang Indain army aser Assam police den tamajungba liasü. Itemji karbo ano taüum alitsü südi. Item telok jagi ozü kidanger ka dak azükba bilemtetdangbo tang ya bushia onüa dang bilemer. Aji oda alar tia nung dang liaka Naga nüchiso atema nokdaker India linük tulubai majemrepteti tesashiba aküm nungji 1st December 1963 Indian union nung state ka (16th state) agütsü. Aji saka Indian union nung state ka atema noktaker masüji Naga National movement tali tesashiba aküm nungji linük tulubaia shisabulua yimjung yanglutsü asateta yimjung atema jembitsür temesüng nisung Rev. Michael Scott Indo-Naga peace Mission member dena jembir Indo-Naga cease fire tezüngzüktep yanglua 6th September 1964 sangdong. Iba anogo tenla ki ajak nung sentong tulu yanglua kin tenzüker tushiba den Tsüngrem tenüng asang. Joko tanü nungi tepsetba, kasetba aser reshikangshi malitsü ta-ang masü tasürtem to-a shia arutsü aser zükreper leni maoertem toa aneptsü amai bilema pelatep. Iba anogo (6th September 1964) yamai ken aten. Iba anogo Tsüngrem tenüngsang ken linuk tenzüker kati English agi sayu nung aji dang zülur. God bless my Nagaland, land that I love, stand beside her and guide her through the night with a light from above, from the mountains through the valleys, through the meadows where I roam, God bless my Nagaland my home sweet home.
1964 sülen küm eshika cease fire anogo ya retreta among, saka tanübo Tsüngrem tenüng asangtsü limit ka dang ali ama calendar nung dang enoktsür saka calendar-i ola madokerji nüburtemibo zübazüba süidaktsür. Anungji kümtemji süiaka iba anogo yabo metsüngareta among nung ajungtsü ta bilemba lemsateper.