9 buba Asia Pacific Baptist Congress nung Syntonia choir-i shilem agi

9 buba Asia Pacific Baptist Congress nung Mokokchung nungi Syntonia choir-i ken atendang agiba noksa ka angur.

Dimapur, October 6 (TYO): Indonesia kübok Sahid Jaya Hotel & Convention Yogyakarta nung 9 buba Asia Pacific Baptist Congress ayongzüka agi.
Iba mungdang ya September 25- 29, 2017 tashi “Never Ending Good News (Jesus Saves)” omen nung ajemdaker agi.
Asia Pacific kübok linük 21 nungi teshimtet nübo 1100 shi iba mungdang nung aden aser mungdangji The Baptists of Indonesia aser The Union of Indonesia Baptist Churches temi ayongzük.
Mungdang lapokba sentong nung Rev. Dr. Ross Clifford (Australia)-i tesentepertem pelaa agizük.
Mungdang nung küm pungu atema APBF tir inyaktsü atema Rev. Edwin Lam (Singapore) shima liasü. Pa den külemi Bijoy Sangma, GBC, India, Ratu Inoke, Fiji aser Mark Wilson, Australia nungertem Vice-President tem inyaktsü shim.
Külen, Okinawa Baptist Convention, Japan nungi Vesekhoyi Tetseo (Vee) General Secretary inyaktsü shim.
Iba mungdang nung Syntonia, Mokokchung aser Nagaland Baptist Churches Council(NBCC) tenüng nungi Union Baptist Church, Kohima temi shilem agi.
Taruba Asia Pacific Baptist Congress ji 2022 küm Seoul, South Korea nung amungtsü.
Syntonia ya Mokokchung nungi nüngtugu choir ka lir aser parnoki Nagaland nung aser adena orr sentong aika nung shilem agia arur. Iba kentener telok nung apuanitem dena lir aser 2015 nungi parnoki kententsü tenzük.