AAP MLA Manoj Kumar police-i puogo

Manoj Kumar-AAP

New Delhi, July 09 (Agencies): Nisung ashioktsüba aser kulikaket taila amshiba ken o nung tai tonglokja tanü Brihostibar nü Delhi police-i Kondli nungi AAP MLA, Manoj Kumar puogo.

Kulikaket taila bener tangar meyong ali-kimong pei meyong küma ayoktsü merangba ken o nung MLA Kumar nem tai tonglokja lir, ta police-i ashi.

MLA Kumar ji Karkardooma court matsüngdagi anir aoba sülen court-i anogo ananü police ket nung ayutsü asoshi tuyuogo.

Yaküm August ita nung New Ashok Nagar police station nung Manoj Kumar anema ken o ka benoka liasü.

Manoj Kumar asoshi okatsüsangi, iba ya yimtenren nung tsükchitep ajanga lir, aser pa apubaji temzüng alema lir, ta aitsüogo.

“Parnok (police) Delhi sorkar den tashi atsütepba mapang ka asübayong police-i Manoj Kumar (AAP MLA) anema inyakogo,” ta okadak MLA Kumar asoshi okatsüsang HS Phoolka-i ashi.

“Police-i kodanga onok jaoka meliasü,” ta Phoolka-isa ashi.

Ita ana tejaklen Kumar-i nisung kar anisemer Delhi Mayur Vihar (Phase-III) nung nisung ka dak azük ta pa anema FIR benokba sülen tanü Police-i pa puogo.

Aibelen ken o balala dak sentakba nung Delhi police-i AAP MLA nisung 21 dak tenük yoka lir, aser item MLA rongnung Kumar densema lir.

Taoba Delhi MLA aser Delhi law minister Jitender Singh Tomar-a tazüngba kuli kaket taila amshiba ken o nung police pua liasü.

You must be logged in to post a comment Login