ACAUT Nagaland-i ACCIF aitsür

Dimapur, September 15 (TYO): Anti Corruption and Crime Investigation Front (ACCIF) HQ Purana Bazar, Dimapur, Nagaland ta ser taila telok kati East Dimapur temeket nung shishilembar nem timtem agüja arur aser iba telok ACAUT Nagaland-i khukhua aitsür, ta Media Cell sangdong ka nung ashi.
ACCIF-i saru aser tenla meshiba ajanga shishilembartem kanga meinpronger aser mapang kar nungbo parnoki shishilembartem amokmerenogo. Iba dak sendakba nung Dimapur police-i nisung ana apu aser tenaji Longritemjen (Vice Chairman ACCIF/ Purana Bazar village council member) aser Pradeep Sethi (Advisor ACCIF) na ta jangjaogo.
Dimapur Police-i taila telok nung tanishirtem apuba atema ACAUT Nagaland-i tenüngsang agütsür aser ano maneni iba telok nung züngsemtem ajak tekaratiba nung aputsü ayongzüker, ta Media Cell-ia metetdaktsü.