ACAUT Nagaland-i Nagaland State VDB Association aitsür

Dimapur, September 20 (TYO): State sorkari financial year 2017 nungi tenzüka MGNREGA kübok Direct Benefit Transfer (DBT) mapa küma inyaktsü sentong Nagaland State VDB Association (NSVDBA)-i magizükbaji kanga dang taoksatsüka lir, ta ACAUT Nagaland-i ashi.
DBT kanga dang ajungbena tenzükba ajanga MGNREGA nung tamakok alutsü ta VDB Association-i ashibaji tamangtsü mali. Association-i tebilemba tamajung nung DBT magizükbaji Nagaland nung alirtemi jungjunga meteta lir, ta Media Cell sangdong ka nung metetdaktsü.
Nagaland state VDB temi MNREGA programme mapa inyakbaji tanga state aika dang nungi tajungba lir ta NSVDBA-i ashibaji shitak, kechiyong Rural Development dept. (RD) aser VDB temi tang inyakba maparen ajanga sen aika miimzüka agiteter.
DBT tenzükba ajanga yimtsüng nung sensaker job holders timtem ajurutsü ta NSVDBA-i ashir saka ACAUT Nagaland-ibo ibaji magizüker, kechiyong DBT ajanga timtem ajurutsüpurtemji RD ketdangsertem aser VDB secretary tem dang asütsü, ta Media Cell sangdong nungsa shia lir.
Nagaland sorkari iba ama tasa tamajung nem mekokdaktsütsüla aser Nagaland nung sensaker aser yimtsüng nung alirtem yaritsü atema tekaratiba nung mapa inyaktsüla. Nagaland nung job card holder tem bank account lapoktsü aser ibaji Aadhaar den sendakteptsü atema sorkari mapa inyaktsüla.
Nisung kar mulungba sülen Nagaland sorkari manidaktsüla saka nübortem atema inyaktsüla. T.R. Zeliang-i aniba sorkari nübortem ajungkettsü atema inyaker ta ashir anungji sorkari DBT inyakyim tenzüktsüla, ta ACAUT-isa shisem.
Ano külen, NSVDBA-i MNREGA 2016-17 atema sen crore 1500 dak tema amshiba osang tejangja metetdaktsütsüla, kechiyong Finance Department-ibo double withdrawals ta temulung melemi bilemba indang osang magütsütet, ta parnokisa ashi.