ACAUT Nagaland-i PIL benok

Dimapur, November 6 (TYO): Special Investigating Team (SIT)-i bushisüngdang asüba nung temulung masüba aser ano Chief Minister T.R. Zeliang-i Coordination Committee on Fuel adulteration (CCOFA) dang nangzükba ama mapa meinyakba atema ACAUT Nagaland aser tangartemi Gauhati HC, Kohima Bench nung PIL ka benokogo, ta Media Cell sangdong ka nung metetdaktsü.
November 6, 2017 nü High Court nung PIL ji benok aser iba nung Chief Secretary, Nagaland; Chief Minister’s Office; DGP; Commissioner & Secretary, Food & Civil Supplies; Director of Food & Civil Supplies; Commissioner of Police, Dimapur; Ministry of Petroleum & Natural Gas, aser CBI dang ita ka tsüngda telangzüba agütsütsü shia lir.
Food & Civil Supplies Department ketdangsertem aser yimsüsürtem kümzüktsü atema dang SIT ji tentetba liasü aser ozüng alema totzü shibelenba nung tongti mapa inyakertemji tang tepuokdak yua aliba non-local ishikaji masü ta PIL nung shia lir.
SIT-i iba mapa inyakertem anema ken o mebenoktetba agi ACAUT aser tangartemi High Court nung iba ken o CBI nem bushisüngdang südakjang ta mepishiba PIL benoktsüsa aküm, ta Media Cell sangdong nungsa metetdaktsü.