ACAUT Nagaland sentong nung adentsüla

Naga lima tia kanga dang tamajung ka nung tanü asenok alir. Asenoki reprangdangra ajaklen teraksa agi süngogo aser inyakyim ka danga shitak meinyakba asen tenük agi angur. Ajak dang tamajungtibaji sorkar ketdangsübaren nung lir aser küm aika Naga nunger yimsüsür aser ketdangsertemi anir sorkar mapa inyaker aikati otiotia yimjak nung ochimashi mapa inyakba, temzüng alema inyakba aser süpokrem agia inyakba ajanga asen lima ochimashi aser teraksa agi süngdaktsüogo aser tammang tia ka bener arutsüogo. Gari lenmang nung gari nung yutsür tetsüng agia tesenzü majung, apu nungbo tsüremseta ang süir, sorkar mozükitem nung mozü mesüra tang nüngdakba facility peria mali, meshirangertema shirangtsüsa teshinem agi sünger, sorkar school ki tem telaoer aser kar nungbo kilem/jara mali lir, saka kanga dang tesüngmangtsükaji, item ajak atema senbo crore meyirjangsa meyirjang agizüka chiadoker. Yamaji yimjak nung otiotia aser tiyazü kulikakettem agüja sorkar yimsüsür, ketdangsertem aser contractor temi Naga nunger ajak tenüng nung sen auyazüka agir. Ano külen, department balala nung backdoor nung shimokba ajanga Naga lanurtem zünger mapa mangur jenti lir aser department kar nungbo itasen-a magütsür mapa inyakertem timtemdaktsür. Kaketshir nem küm nung khen scholarship agütsüba nungia auyazüka achitsü mulungsentsü aketba sorkar yimsüsür aser ketdangsertemi Naga lima kanga mejungi raksatsüogo. Naga lima nung ochimashi aser tashiyim mapa ya komaser agientsü ta nübortemi kanga khuret bena bilema alidang, Tsüngremi tasütait Naga nunger lennir kar den jembi aser parnok nem teratetba shisatsü agüja ACAUT Nagaland ta ser telok tasen ka tentet. Nagaland nung telok zünger mezüngma tenteta liaka, ACAUT Nagaland tentetba sülen ang parnoki nübortem timtem-tuoshi angateta ola adoktsü tenzük aser Naga lima tia melenshitsü nükjidong yur tasütait mapa inyaka arudar. ACAUT Nagaland tentetba sülen nungi Naga nunger asoshi mapa tajung zünger mezüngma inyakja arudar. Naga yimten teloktem nungi tenzüker sorkar aser sorkar department balala nung tim masüba inyakyim, ochimashi, tashiyim aser süpokrem agiba onüktem tuteta, ACAUT züngsemtemi kanga dang tasü itta mapa inyaka arudar aser jungjunga reprangdangra inyaksangshi nung temelenshi adokba angur. ACAUT Nagaland nung züngsemtemji itasen balaka mesüra taa balaka agüja inyakertem masü, saka pei rongsen endoka mapa inyakertem dang lir. Tesüiba mapang ACAUT tanishir karbo nisungtemi pua merenshiogo aser kar yimjak nung amokmerenogo aser shibai metet, tanü-a parnok ayipjanga memejangdaktsüi meinpronga mesüra amokmerena alitsüa akok. ‘Naga lima nung temelenshi dang bener arura, ochimashi aser tashiyim dang agienra, kü taküm bendanga agütsütsü mapayur’ ta asüba tangatetba nung ACAUT Nagaland züngsemtemi anibelem arema, rongsen endok mesasai, nübo aser shisatsü agüja, Naga nunger ajak ajangzüktsü atema mapa inyaker. Süra, tanüngba Naga nungertemia kechi ashir. Asenokia ACAUT Nagaland ji pusema nungita yariteptsü asü odang yutsütsü. Atangji, asenoki ochimashi maginür süra, atangji asenoki Nagaland nung tim masüba, tashiyim aser angbangyima inyakba mapatem magizüker aser agienür süra, ACAUT Nagaland-i inyakba mapa nung pusema nungittsüla aser aseni akokba tashi yariteptsüla. Takokertemi rongsen agi yaritsüla, rongsen magütsütetteri nübo agi, nübo magütsütetteri shisatsü agi, shisatsü magütsütetteri sarasadem agi ta pei akokba nung ACAUT Nagaland atema tajung bilema yariteptsü mapang ka lir.  Asen Nagaland nung telok onsara tenteta lir, saka asenoki reprangdangra aser tesüiba mapangtem inyakbatem meyipa reprangdangra, tanü ACAUT Nagaland-i ochimashi anema tasü itta inyakba amaibo telok shingaia inyaka mali. Anungji, ACAUT Nagaland-i asüng alitsü ayongzükba sentong nungji tangatetba shitak aser ochimashi maginüba Naga nunger ajak adentsüla. Shitakba agibo iba sentong nung ya khangtepa adentsü tim. Hao, Dimapur nungang alitsü ayonger asü nung tanga district balala nung aliba Naga nunger tarunür ajakbo arua medentettsü, saka Dimapur nung aliba Naga nungertembo, tetsür-tebur ajak süngpo nungi shir temapur ajaki iba sentong nung adentsüla aser onokia ochimashi maginür ta kuli sayutsüla. Kokra, iba sentong nung Dimapur nung aliba Naga nunger kibong shia nungi nübo kabosa adentsüla aser ACAUT Nagaland-i ochimashi anema inyakba mapa pusemer ta sayutsüla. Alima nung tesüiba tatalokbatem meyipa reprangdangra, iba amai nübortemi ola adokba aser longjemer inyakba ajanga temelenshi bener aruba kuli aika lir. Anungji, iba nübortem sentong nung asenoka tangatetba shitak nung adentsüla aser iba ya Naga lima tia melenshiba aser Nagaland nungi ochimashi samadaktsüba sentong ka südakjang ta teimla yur, sarasadema ACAUT Nagaland sentong nung adentsü aser pusema nungittsü ayimoktsür.