Activist 2-i benokba FIR nung ajemdaker MLA anema ken o benok

Shillong, Aenjeti (January) 9 (Agencies): Activist anati FIR ka benokba sülen police-i South Shillong MLA aser taoba Deputy Speaker, Sanbor Shullai anema ken o ka benok.
Sanbor Shullai-i ozüng alema Meghalaya Legislative Assembly nung mapa aika nung nübotem shimok ta local activist ana- Agnes Kharshiing aser Angela Rangad nati FIR benokba nung ajemdaker police-i pa anema ken o benok.
Shullai-i ozüng alema aser tim mesüi mapa nung nisungtem aniok. Pai Prevention of Corruption Act nung Arrla 13 alema inyak, ta FIR nung shia lir.
Iba FIR nung ajemdaker Meghalaya Prevention of Corruption Act kübok Shullai anema ken o ka benokogo aser gazette officer kati ken o bushisüngdang südar, ta East Khasi Hills Superintendent of Police, Davis Marak-i osangbener dang ashi.
Külen Shullai-i osangbener senden ka nung ashiba agi, “iba ya kü den tokteper Banri Kupar Wahlang-i atonga inyakba yimten mapa ka lir.”
“Hai ni tejak repranga inyaker saka ibaji kü constituency nung alir ajak atema lir. Kü jabaso mesüra jalai sorkar mapa atema tenüng agütsüra aser pa/lai tajungtiba nung takok ngua mapaji ngura, iba atema kü dak tai metongloktsütsüla. Ni nisung shimba ketdangser ka masü aser iba mapaji bangdak department-i dang ketdangsüa inyaker” ta paisa metetdaktsü.
Aenjeti 4 nü Kharshiing aser Angela Rangad nati Sadar police station, Shillong nung Shullai anema FIR benok.
Pai tashiyim agi secretariat nung par kinungertem mapa nung shimok ta tenati FIR benokba nung shia lir.

You must be logged in to post a comment Login