Afghan arrtsü anasa Pakistan nung bomb apok; nisung 9 pokset

Miranshah, December 06 (Agencies): Afghanistan arrtsü anasa aliba northwest Pakistan lushi nung motorcycle ka nung bomb inoker pokdaktsüba lendong nung nisung 9 pokset, ta ketdangsertemi Bodhbarnü ashi aser iba lendong ya nuclear nok-o-nü bena aliba linük nung lendong agütsüba rongnung tesüsaba alitsü.
North Waziristan region nung aliba Mir Ali jila ajanga Mongulbarnü aoba mapang iba bomb ya remote control amshia pokdaktsü, ta Pakistan nunger ketdangser asem-i ashi. Saka par asem nem osangbener den jembitsü temelaba magütsüba ajanga parnok tenüng memetetdaktsü.
Iba osang tejangja asüngdangtsü asoshi Pashtun region nung Pakistan mitkar indang odongtar den jembitsü merangdang, saka telangzüba kicha mali.
“Waziristan nung maneni azü ayimer,” ta northwest Pakistan nung aliba jila tuluba, Peshawar nungi police ketdangser Tahir Khan-i ashi saka paia osang tejangjabo memetet, ta shisem.
Iba lendong agütsüba asoshi telungpur telok katia tenüng agia mali.
North Waziristan ya mapang talangka nungi Taliban aser al-Qaeda den sendaktepa aliba Pakistan aser bendanger Islamist telungpur atema tesep ka ama liasü, saka 2014 küm tiyong nung Pakistan mitkartemi iba tesem atsüngteta liasü.
Mitkartemi item telungpur ya timba atsüngdok aser parnok indang tesendaktep raksaja Afghanistan aser Pakistan tesem balalai jenshia liasü.
Saka telungpurtem ya maneni tesep tenteta lendong tulu agüja arudagi.
Taoba Hokulbar nunga Pakistan Taliban suicide bomber asem tashi Peshawar nung aliba college ka telungi ia lendong agütsüba nung kaketshi ti aser tanüker ka taküm samatsü.
Iba lendong madalok tsüngta kasa tesem nung suicide bomb amshia amakba lendong nung police tanishir ka tepset.
Northwest Pakistan nungsa Pakistan Taliban temi Mongulbarnü Taliban anemer ka tepset aser iba lendong adaloktsü hopta ka lia sorkar busemer dak nükjidong yur amakba nung nisung pongu tepset.
Pakistan Taliban temi sorkar laodaktsütsü aser Islamic law sashia amshitsü meranger. Parnok telok ya US-i aniba mitkartemi 2001 nung kokteter aliba Afghan Taliban den sendaktepa lir.
US Defense Secretary Jim Mattis-i anogo eshika tejaklen Pakistan semdanga telungpur den raratsü asoshi tashi taitba nung nokdaktsü asoshi ajungshia lir.