AGM, NFR Maligaon-i Kisama semdang

AGM, North Frontier Railways, Maligaon, Guwahati, Lokesh Narayan aser tanga ketdangsertem noksa nung angur.

Dimapur, December 07 (TYO): Additional General Manager, North Frontier Railways, Maligaon, Guwahati, Lokesh Narayan-i December 7nü Naga Heritage Village, Kisama nung tang temungdak Hornbill Festival semdangogo. Pa den külemi Addl. Divisional Railway Manager, Lumding, Assam, Suratha Jani aser tanga ketdangsertemi iba benjungmung semdanga liasü.
Pai ashiba agi, iba benjung nung adenba ya pa asoshi tajangshiba khenyongi balaka lir, aser pa taküm nung iba amala sentong ka nung tang mezüngbuba dendanger. Paisa ashiba agi Naga nungertem ya kanga dang medemtsü tajung, tebur tajung aser parnoki ainertem dang kanga junga benshiba atema nüngtugu lir. Pai iba benjung ya linük nung tanga
Tesemtem nung alirtem nem metetdaktsütsü asoshi shisa lemsatep. Maneni pai ashiba agi, bendanglen nungi raliwalirtem aika arua iba benjung nung kanga jangratema mungdar, saka India nung alirtemi Nagalang nung kechi atalokdar aji memetet.
Iba sentong kanga junga renemer akaba atema tenüngsang agütsüba den külemi paisa ashiba agi, sentong ajak kanga junga renemogo aser alima tesem balala nungi arurtem iba benjung kanga jangratema mungdar. Pai taruba küm tem nung iba bejung nung tanaben arua adentsü asoshi imlaba lemsatepa liasü.