AKTD-i ENCSU pusema nungiter

Dimapur, November 9 (TYO): Department of Higher Education-i Scheduled Tribes Students indang scholarship tebilemtsü mekoktetba atema Eastern Nagaland College Students’ Union (ENCSU)-i black badge campaign tenzükba nung Ao Kaketshir Telongjem Dimapur (AKTD)-ia pusema nungiter.
Department ajanga Union Ministry of Tribal Affairs-i mezüng installment dang agütsü ta ashibaji shitak süra, bangdak ketdangsertemi ibaji medentsü atema kulikakettem sayutsüla. Ibaji asü nungdang ‘installment scholarship’ ta ajaba onük atema ratatepba ya mali akümtsü, ta AKTD tir Lanutoshi Aier aser tongti zülur Moayanger Jamir nati sangdong nung shia lir.
Nagaland nung scholarships agütsüba inyakyim nung ashishitep kanga adoka lir aser iba ya süoki ia bilemtsüba onük ka lir. Küm shia Naga nunger kaketshir meyirjang aika scholarships mapang shitak nung mengui timtema arur. Tanü lanurtemi sorkar inyaksangshi nung temulung melemteti kümogo. Higher Education ama department kati tangaria jilu ajizüktsüsa mapa inyaktsüla sürnung, parnokia tim mesüi inyaksangshir ama ajiteter, ta AKTD mendenpurtemisa ashi.
Iba onük atema Nagaland nung aser tangalen aliba lisopur kaketshir telok ajak longjemer inyak nung ajungtsü. ENCSU-i Naga nunger kaketshirtem ajak ajangzüktsü mechi nung iba mapa inyakba atema tenüngsang agütsür aser AKTD-ia akokba tashi yariteptsü mulunga lir, ta mendenpurtemisa metetdaktsü.