Alemtemshi Jamir-i Angetyongpang nung nübu ayim tenzükogo

Mokokchung, Tsüklai 9 (TYO): Nationalist Democratic Progressive Party (NDPP) candidate Wb. Alemtemshi Jamir-i pa 24 Angetyongpang Assembly Constituency nungi tokteptsü asoshi osang sangdongba sentong den nübu ayimba maparen tenzükogo.
Pai Rogonü (Hogulbarnü) Longkong, Yaongyimti Old, Yaongyimti New aser Phangsang sema pa election-i aitsü asoshi osang sangoktsüogo. Angetyongpang nungi candidate rongnung election-i aitsü osang sangdonga jajabaji pa ya mezüngbuba asütsü, ta angazüker.
Pa election-i aitsü asoshi sangdongba den nübu ayimba sentong balala nung jembia senzüdang, Naga People’s Front (NPF)-i aniba DAN sorkari mashileni küm talangka yimsü süa aruogo, joko DAN sorkar dak nüburtemi teimla makai akümba ngua tarutsü Nagaland tajung ka yangertsü nükla yur NDPP telok ya tentetogo, ta NDPP Working President aser Angetyongpang candidate, Alemtemshi Jamiri metetdaktsü.
Paisa NPF-i aniba DAN sorkar aija jembidang, NPF-i sorkar aniba mapang temzüng kecha mali ama yimsü asü, mapatong ajak odia masü atsükshishia dang inyak, rongsen ang angatet, tashi (power) ang bushi, menden ang raktep aser ochi mashi mapa aika inyak, ta ashi.
Assembly minute 15 dang amenba, itasen junga magütsüteter, lenmang kata junga mali, joko NPF telok ya tetsür tanuri dena laktetogo, DAN sorkar ya sorkar ta ajatsü malang aser Nagaland nung sorkar tamajungtibaji ibai asütsü, anungji, iba ama sorkarji nüburtemi menüngdaker, ta paisa aitsü.
Iba ama DAN sorkar nemsa ano sorkar bener odaktsüra, tarutsü lanu putu tali majungtsü, anungji, teimla maliba sorkar atsüngdoker lanu putu nem teimla yutsütsü asoshi sorkar tajung ka bener arutsü nükjidong yur NDPP ya tentetba lir, ta ashi. NDPP ya “o masü mapa agi” ta asüba omen nung ajemdaker ochi nung yimsü süa alima melenshitsü tangatetba nung tentet, ta paisa rajemtsü.
Paisa Angetyongpang nungi tokteptsü lemtetba nükjidong ashidang, iba constituency ya terenlok agi aiben junga matongba reprangteta lenla ajak nung tangar den lirumedema jenjang ajungkettsütsü tejangraba aser teimla tulu nung yangi nungi tokteptsü mulungtet, ta metetdaktsü. Paisa NDPP-i sorkar kümer külen inyaktsü nükjidong balala ashiba den NDPP nem vote agüja pa adokdaktsütsü asoshi nüburtem dang mepishia liasü.
Taoba Nagaland Chief Secretary Wb. Alemtemshi Jamir IAS ya Longsa nunger taoba Nagaland Chief Secretary aser minister asür N.I Jamir jabaso lir.
Sentong balala nung Alemtemshi Jamir atema nübu yimja taoba Minister Jungshilemba den ano taoba MLA Aolepden, taoba MLA Imtiyanger, taoba MLA Akum aser NDPP telok nung lenir balalai pa indang kuli tajung shia shilem agitsü.