Alima lendong asoshi renema lidi

Tesem tesem nung tzünglu kanga arur, yipru aiter aser menoknok anoktsüba tesem nung asenok alir. Iba ama mapang nung  asenok renema alitsübaji kanga nüngdaker. Iba atemaji government kanga shisa bolutsüla aser ajungben alima lendong ataloknunga jet ta lendong atalokba tesem tonga oagi yaritettsüsa nüngdakba nübo aser oset ajak zep ta renema alitsüla. Iba osang züluba mapang nunga Mizoram yimtiba, Aizwal nungbo tzünglu kanga aruba ajanga ki karbo anenzüka aoba osang angashir. Iba kasaji Nagaland nunga Mon town nunga ki karbo anenzüka aoba otsü angashiogo. Iba ama lendong, talisa, tenem nung küma aliba yimti Kohima aser Mokokchung nung atalok nungbo koma asütsü ta kanga shisabolua bilemer. Tenem nung yangluba kitem ya longren longpang tupoka lenden kümdaktsür yangluba kitem teimba lir. Ibaji dang masü saka government-i repranga tasazük aser telatet ozüng kar agütsür yangludaktsüba masü saka ki kiburtemi pei mulungba nung yangluba kitem lir. Aji oda, tenem nung long ki tulu aser talang amentepa yanglua aliba ya engineer mongintem shisatsü agia yanglubaa masü saka tsümar kisürtem mulungba nung yangluba kitem lir. Iba kasaji lenden lima Dimapur nunga Town Planning aser Municipal tetuyuba aser talenba kecha mali pei sünütsü süyonga atuba joko karibo azüklen takdang terben tashia atongtepa yangludagi. Itemji ali agi mesüra tongshi agi makok chirep nungbo iba kidang alirtem dang masü saka kidanger kitem dena chirepa lendong tulu ataloktsüba tia nung asenok aika lidagi. Iba amaji tang ama tzüngluruwa mapang ya tesem aika nung anentsüh alutsü, yipru tulu aittsü aser menoknoka anoktsüa akok. Ibaji ajak asoshi shisabolutsüka lir. Ajisüaka, asenok asoshi ano iba dang nungi shisabolutsü tuluba kaji, tawa Nagaland Chief secretary-i Nagaland nung tamangu alima lendong atalokdang yariteptsüsa government renema mali ta metetdaktsüba osang to asütsü. Tanü Nagaland nung tesem aika nung kitsük kirong lendong nung jet ta oagi yaritettsüsa fire brigade pur ket nung gari peria maka. Anarongdena district headquaters nung mi insepba gari kaka anana kar asütsü. Item jagi district headquaters alema orr yimtsüngtem nung kitsük kirong atalokdang mapang shitak nung tonga oagi meyariteter. Iba tia nung Nagaland tesem kar nung kiyong ka anenzüka orr asüama aser yiruyipong aser timtem takoksa ajurutsüsa atalok nungbo Nagaland government-bo repranga atatsü asü (?) ta asüngdanga ariteptsüba mapa ka lir. Alima nung alir asünungji, ajungben lendongji tajurutsübasa, anungji government dang masü saka nisung ajak renema alitsüla. Alima lendong timtem atalokba mapang mezüng teinyaktsüji tasürtemji kong ayutsü, yiruyiponga alirtem kong bener oa anepalutsü aser ki makartemji kong jenokdaktsütsü ta asüba tebilemtsütemji asütsü. Anungji, ki chirepa aliba telongi irr yangji aliba nisungtem anitetter külenang, yirua alirtem mozü kidangi bener aotsüba mapatemji yakta dang telemtetba agir inyaktsüba mapatem lir. Ajisüaka, item mapatemji inyaktsü nisung renema melira aser government mozü kidang yiruyiponger yaritsüsa nüngdakba mozütem den tayarir peira melira, nisungtemji repranga südaktsütsüba dang asütsü. Ashiko, asenokibo kitsük kirong lendong nung amshitsü gari alia ayutsü agibo iba senji lema agidi asütsü, aji oda mozü kidang taneptsü angutsüsa tipdema renema ayutsü agibo asen alitsü kiang tajung ka asütsüang bilemtsüa akok. Tang asenoki yimtitem nung motzü aodak ali agi nembanger yangji ki asür. Akhidang motzü yimokba ayong dena nemdanger ki tulu aser talang yanglua lir. Anungji, tzünglu arudang motzü taodak maka yimti yimdong agi awatsüng akümer. Aji oda, asenoki kilentzü merüka ayutsü melen kilentzü nung asen kidang okdenba janarüja aser süoshi aser oset tejen ajak tokoktsür. Iba jagi kilentzü nung motzü moutet yimdong nung ayimer. Item ajakji asenoki asenoksasa lendong meshiba mapatem lir. Item ajakji bilemdanga, tang nungibo kechisüdir süaka menoknok anokyonga aser yipru aityonga kiojen melaotsü aser meraksatsüsa ajaki bilema renemtsüla. Iba denji goverment nung alirtemi nübortem lendong mapang kümzüktettsüsa aser yaritettsüsa renema lir ta shitettsüla !