Alima nung alir ajak dangi

–  T. Lima Tzüwar (Ungma), Artang Ward.

Asen Naga lima nung alir nütsüng nübur aser amangbapur dang masü alima nung alir ajaki kanga kümdanga alitsü asoshi Tsüngremi jembiba yamai shiner. Tongtipangsa asen Nagaland nung aliba nübur aser amangbaburtem kanga kümdanga alitsü mapang lir. Amangbaburtemia sang, nütsüng nüburtemia sang iba lima dang Kotak lima ta tejembi ta ashir. Tesem ajaklen nüktapangta agi sünga lir, angpangyim, merumeru, ochi mashi, pei agitsü dang bilema chia jema aliba dang Kotak lima ta ajar. Kotak aser molumi atangji lir. Nenok sür külen nenok tanüla agi Kotak aser Molumiji angutsü. Nenok shi agi ali küma mao tashi nenoki Kotak aser molumi kodanga mangutsü ta Tsüngremi ashir. Teka agi yangluba süngyanglu külemertema sang, Shiruru külemer aser anü ita külemer aser Khristanpur ajak asoshi Tsüngrem ka dang lir. Shibai kechi jembi, aser kechi inyak aser shirnoki kechi jembi aser inyaker ajakji reprangdar ta ashir. Iba lima rangben ya tzüyim dang kümdaktsütsü aser ali rongsen aser ki aser gari ajak mitsü kümdaktsütsü koka lir. Iba lima nungbo shirnoki kechi amangner amangang, saka Tsüngremi yangluba nisung shir teloki reshikangshir parnok ayatai, kechiyong ajak asoshi Tsüngrem ka lir, Pai o bendangtsü. Alima kin ajak asoshi pei tanüla o bendangtsü asoshi board tulu ka lir, anungji na kodang südir nü tanüla iba board nungi o bendangtsü. Pei inyakba yari agi o bendangtsü asünung aika ajebtsü ta Tsüngremi ashir.