All Tripura 10,323 Teachers’ Association sorkar nem ghonda 48 züngzüktsü

Agartala, December 06 (Agencies): All Tripura 10,323 Teachers’ Association ya teasyurtem mapa nungi anentsürtem telongjem lokti tentet ka lir, parnoki yashi state sorkar dang parnok asoshi lenmang tanga ka achaayangtsütsü atema ghonda 48 züngzüktsüogo.
“Onok ya tarutsü koda asüjar mejengjai kümogo. SC-i obendang agütsüba sülen onok kinungertem dena amoa maoer. Anungji onoki state sorkar nem onok atema tanga lenmang ka achaayangdaktsüner,” ta Uttam Kumar Dey-i Association tenüng nung ashi.
Paisa ashiba agi, tesayurtem meyirejang aikati state sorkar dang parnok tarutsü yanglushitsütsü asoshi khanga December 6 nü nungi tenzüka ghonda 48 züngzüktsüogo.
“Sorkari onoki akhangba ya mataloktsüra onoki state ajunga mokdanga ayutsü. Onoki National Highway aser Railway service mapang telatet ka makai mokdanga ayutsü,” ta Dey-i ashi. paisa ashiba agi, parnoki longkak aitba sentong ya Dhalai district kübok Manu tesem nungi tenzüktsü.
Dey-isa ashiba agi, sorkari onoki akhangba madaloktsüra tesayur 10,323 aser parnok kinungertem ajak iba longkak aitba sentong nung adentsü, kechiyong joko onoki maremzükteter. Right to Education Act (RTE), 2009 inyakyim nung mesüi tesayurtem shimba, agintsü atema High Court ajanga telemtetba agütsüba Supreme Court-i agizükba sülen tesayur 10,323 mapa nungi anendaktsütsüba lir.

You must be logged in to post a comment Login