Alokba dangi par medemer ka arua pungmang ratetdaktsür

Medemer : Hai! Kabur, junga dang lir südi? Tanübo nüngdak ka atema nü dangi arur-ako.
Alokba : Hai! Kabur junga dang lir ako arung, mapang talangka mongutep aliba, na arubaya pelar ako, koda komala nüngdak’ar shiangma.
Medemer : Ina! Kabur, ni yasüng pungmang ka pungmanger saak. Saka ni pungmangji meratet-tet kanga rata-a na bushia aruba-ati.
Alokba : Pungmangji shidangangjong.
Medemer : Ina! Kabur pungmang nungji ni ozü kima anünglen repranga khen noktakdang anüng tom nungji Hindu nunger tsüngrem tulu ka teka aika keter noktaka ngur ni züshia saak, aser pungmangji bilemdang saka ni meratettet. Nibo ozü kibong nung temoatsü merüra lendong ka atalokdisü ta rataseta nü sangi aruba-ati.
Alokba : Aya Kabur, nai kanga mezünga pungmangtetogo ya. Pungmangji nür kibong atema masü asen Naga lima yimden aser lenirtem noksa mangdang sayuba ati.
1. Asenok ajaki metet Hindu nunger tsüngrem dak tenük keta lir saka mangur. Yamaji asen lenirtema (ministers aser MLA’s) parnoki alima teraksa aser nüburtem timtem mangur.
2. Hindu tsüngremi mejembiba ama asen lima aser nüburtem ajungtsü atema mejembir.
3. Hindu nunger tsüngremi kecha mangashiba ama asen lenirtemia nüburtemi jembiba aser ayimtenba ola mangashir.
4. Hindu tsüngremi mejajaba ama parnoki (lenirtem) alima asoshi awa-a oa inyaka mejajaba tetezü lir.
5. Hindu tsüngrem dak teka aika keta aliba amaji asen lenirtemji teka aika aten ama Center nungi scheme tapu tapu atema sanction sen Crore sa crore arudangbo kanga kara agizüka lemsa-a chimar aliba tetezü lir.
6. Hindu nunger tsüngrem dak-a tenibo keta lir saka parnoki tango mesashir kechiyong parnokji tasü tsüngrem lir. Yamaji asen lima minister aser MLA- temjia tasü den sako. Parnoki tajung aser alima terenlok atema meshisar aser meinyaker ta asüba tetezü lir ta tang nibo ratetteter ati.
Medemer : Aya! Kabur, na yagi pungmangya jungasa mezünga ratettetera ya, kangasa pelar-a no, tanübo ojang dang südi.

Lilir: Mr. M. Noknen Jamir, Oriental Colony, Dimapur, Nagaland.