Amenba Yaden lenisüba nung Mokokchung DPDB senden agiogo

Parliamentary Secretary for Industries & Commerce and Chairman DPDB Mokokchung-Amenba Yaden

Dimapur, July 7 (TYO) : July 7, 2015 nü Industries & Commerce Parliamentary Secretary aser DPDB Chairman, Amenba Yaden leinsüba kübok Mokokchung DPDB senden agiogo.
Iba senden nung Tsuzapang (NH-2) nungi Khensa yimdak Inter-state Bus Terminus aser Mokokchung – Mariani BRO nungertem sendaktepba Ring road ka yanglutsü atema onük benoka lemsatep.
Senden nungsa ISBT lapoktsü, Mokokchung district nung Swachh Bharat Mission tenzüktsü aser tongtipang tesem atema DPDB road connectivity onüktem lemtepogo.
Tsusapang nungi Khensa yimdak ISBT tashi kilometer 10 ring road yanglutsü atema temelaba meshia jembidang E.E PWD (R &B) Imnumeren-i ashiba agi Nagaland nung Dimapur aser Kohima sülen kanga kara ainba jilaji Mokokchung lir aser kobi melii Dimapur o Kohima ama akümtsü.
Mokokchung nung office hours mapang lenmang nung garitem senzütsü timtem ajurur aser NH-2 densema lenmangtem ulushia yanglutsü mesadem. Anungji tekaratiba nung ring road yanglutsü atema DPDB-i temelaba agütsütsüla, ta E.E PWD (R &B)-isa ashi.
Iba onük ya House-i agizük aser sorkar dangi abentsü telemtetba agi.
Mokokchung DC & DPDB Vice Chairman, Sushil Kumar Patel-i ashiba agi ISBT nung power aser water supply dena nüngdakba mapa ajak tembangogo aser July 13, 2015 nungi bus ajak ISBT-i belentsü.
Mokokchung aser Mon district atema Swachh Bharat Mission (Cleanliness Mission) Brand Ambassador, Ex-MLA Subongmeren-ia senden nung DPDB züngsemtem dang Swachh Bharat maparen inyaktsü atema tebilemba lemsatep.
DPDB züngsemtemisa Mangkolemba sub division kübok Longchem (Nokpu) nungi Tzurong lenden tashi aser Chuchuyimlang nungi Salulamang-Longra-Yangpi adena Yali tashi yangluba gari lenmangtem yanglutsü atema department dangi abentsü telemtetba agi.
Senden nungsa Special Plan Assistance kübok Mokokchung DC complex atema sen lemzüktsütsü asoshi sorkar dang asüngdangtsü telemtetba agi.

You must be logged in to post a comment Login