Andy Murray o Novak Djokovic na ATP rangking Top 10-i maiter

Paris, November 6 (Agencies): Küm ishika sülen Andy Murray aser Novak Djokovic na Hombarnü sangdongba ATP ranking nung tang mezüngbuba temaba asayar 10 rongnung züngoksema mali. Arishi küm 30 tain Murray yiruba ajanga July ita nungi asayamung kecha nunga shilem magi-i arudar, aser pa jenjang asembuba nung aliba nungi 16-i luogo.
Grand Slam asemben tashi koker alisang ya Wimbledon nung tatembangsa asaya, aser iba asayamung nung pa quarter-finals nung America nunger asayar Sam Querrey-i tsükdaktsü.
Murray Bodhbarnü Glasgow nung world number two Roger Federer den exhibition match ka asayatsüba lir, aser iba sülen pa Australian Open atema terenemshiba ka ama Brisbane nung asayatsü.
Kasa mapang nung Djokovic tekatsüla yiruba ajanga tang tashi masayai arudar. Pa tatembangsa Wimbledon quarter-finals nung Tomas Berdych den asaya-a liasü.
Grand Slam 12 ben tashi koker alisang ya jenjang pongu ajema 12 buba nung lir, koba 2007 nungi tang tashi nung pa asoshi jenjang tajemtiba lir. Djokovic taruba ita Abu Dhabi nung exhibition World Tennis Championship nung asayatsüba lir, aser iba asayamung nung shilem agia pa maneni junga asayaa aotsü imlar.
America nunger Jack Sock, shibai Deobarnü Paris Masters final nung Filip Krajinovic 5-7, 6-4, 6-1 agi akok, pa jenjang 13 tejakleni tua ATP ranking jenjang 9buba nung lir.
Nadal Paris masters nung temekok yiruba ajanga quarter-final asaya metembangteti tuguba sülen, pa London nung asayatettsü asü masayatettsüar mejangjai kümogo.
November 6 nü ATP ranking:
1. Rafael Nadal (ESP)
2. Roger Federer (SUI)
3. Alexander Zverev (GER)
4. Dominic Thiem (AUT)
5. Marin Cilic (CRO)
6. Grigor Dimitrov (BUL)
7. Stan Wawrinka (SUI)
8. David Goffin (BEL)
9. Jack Sock (USA)
10. Pablo Carreno (ESP)