Angati Shisaliok

-Tangsen Lemtur

Tawa Annual Status of Education Report (ASER)-Rural 2017 ajanga, tang India yimtsüngtem nung lanur shilem 36-ibo linük yimtibaji New Delhi lir ta memetet, ta asüba osangji mamangteter. ASER-i India yimtsüngtem nung arishi küm 14-18 tsüngdapur lanur 28,323 dang asüngdangyaba ajanga bushitetba agi, parnok aikati shishilembaba dak sendakba ongko tezüpaa memetet aser aikati India map nung pei state-a mesayutet. Ibaji ketdangsertem atema tayongzükba wadang tulu ka asütsü. Tang India nung sorkari tanur arishi küm 6 nungi 14 tashi nem angati shisaliok agütsür aser ibaji temeten ka kümogo, ajisüaka iba jagi meperi ama bilemer, ibayongji ASER-i sorkari küm tatakzük 14 tashi aliba nungi arishi küm 18 tashi kümja shisaliok angati agütsüba den külemi teka mapa balala sayutsü atema benokogo; ibaji sorkari agizüka inyak nungbo yimtsüngtem nung lanur jenti ajangzüktsü. ASER 2017-i iba study ya arishi küm 14 nungi 18 tsüngdapurtem dak rangloker agiogo. Item rogopur ya India nütsüng shilem 10 shi lir aser parnok nem angati shisaliok agütsüba den külemi teka mapa balala sayura parnok tebok mesüa alitsü atema parnoki langkabosa inyaktettsü, iba den külemi aser lokti nema khuret bener marutsütsü. Iba study nung shilem agir lanur 28,000 nungi shilem 5 dang melungtet telok, Pratham-i yariba liasü. Asen state sasep nunga sorkar dak dang meimlai Arogo, lokti tentet aser melungtet telok balalai item lanurtem atema teka mapa training balala agütsütsü maongka jenti lir. 2010 küm India nung tanur ajak nem angati kaketshisatsü agütsütsü atema ‘Right of Children to Free and Compulsory Education Act’ ya latetba sülen kasa küm Rongchii (April) ita nungi mapa küma inyaktsü lemtet. Yamaji sorkari angati kaketshisatsü agüja school nung tenüng züluokba sen magir, lesson sayuba taa magir aser kaket angati agütsür, iba den külemi SSA aser Midday meal sentongtem ajanga India nung sensaker tanurtem aika tangbo school-i oteter. Ajisüaka, nübur atema tia majung kaji Centre sorkari sentong tajung yanglur senotsü agüjaaka state aikati iba mapatong junga meinyaker, ibayongji tanur aika takoksa angur. Centre sorkar nükjidongjibo tajung (linük nung azüng-zülu memetetba nisung kata malitsüla), ajisüaka state aika nung Centre nungi yokba senotsü tim mesüi amshiba ajanga sorkar nükjidong mataloker. Tanü Nagaland nunga item tanurtem nem küm tom tashi kaket magütsüteter, anogo shia chiyungdaktsütsü atema sentongbo (Midday meal) lir saka ita nung khen mesüra züngdangteta dang chiyungdaktsür. Nagaland nunga yimtsüngtem nung tsüraburtemi pei chirnur school-i yokner saka sensak tia ajanga meyoktetter, ibayongji tsürabur akhümbok nung alitsü mapang ka ser nung anojungi tangar kidang yaritepa lia school züngdaktsür. Sorkaribo item ama tanurtem atema sentongbo tajung yanglu saka ketdangsertemi ibaji mangateti inyakba ajanga tanur aikati iba tiaji ajurur. Külen sorkari RTE Act yanglushia arishi küm 14-18 lanurtem nem angati shisaliok agütsüdang Arogo, lokti tentet aser NGO balalai teka mapa balala training agütsü nungbo tarutsü nung item tanurtemji tajung küma lokti nem khuret bener arutsür masü saka lokti ajangzükdaktsür kaka akumtsü.

You must be logged in to post a comment Login