Ano asenok Aortem osang tajung ken kaket agi mangmangtepdaki

–  I. Meren Lemtur, Tzüdikong.

Asen Aortem ken kaket tasen adoka tan atok ya agi asemben pezüben puba adoker asütsü südi. Ken tetezü aser ratet balala ken kaket yanglushi shia committee nung shirnok lidir item pei yimer osü aser ratet balala yanglushia adoker, aser küm ishika iba kensü aser tetezü tu toushiteba tera angazüka denshia oyaa alidang ano nisung kari-i purapujia anogo shia amai Tir Yimyim nung Ao ken kaket nung temelenshi balala tai puteba ashishia adoktsüteper.
Ano tang adokba ken kaket tasenba adoker asen Aortem sentep kidang tekülem nung külem menden ka nung amener ken kasa atener sür nung tetezü balala nung ken adenba agi makmakshishiba mapang ka agi Aortem kangshitep tagi. Temelenshiba kar nungi Ken No-2 nung akhidang nungi “Osang tajung shidi Sentep ki nung” ta azü ajaki ia putu aika iba ken dena aika kotakia ogo. Saka tang tasenba nung “Osang tajung shidi Tenla ki nung” ta meyipzüka lir. Süra asenok jembiba nungjia joko “Sentepi Aor ta masü”, Tenla kidangi Aor ta asütsü asü koda? Süra ken No-200 “Anogo aben Yisu den odi ta atenba ya” Tsüngsang majung dang ta atenba ya” Tzünglu aru dang ni khen khen alangaka ta melenshitsüla, kechiba ta süra tzünglu aruba agiang tsüngsangji majunger ta nibo angateter.
Asen tsürapur aika tongmelang tamang agi lai zünga tongmelang agi ken tena kotaki ogo. Asenoki sarasadem aser sayutsüngi dang Tsüngrem, Yihova, Yisu, Kibuba Khrista ta tetshir, süra parnok ajakji ka dang masü na? Aor asoshibo Tenla ki nung ta atenbajiang Tsüngremi mulungba asü? Kechiaser Tenla ki nungjiang nisungtem senteper pa külemba agiang sentep ki nung ta mezüng adoker jagi adoktsü amai nibo angateter. Anoh ken No ya tali inoksema aden nungang Tsüngrem sentsüwangshir asü? Ken kaket tejenba nung ken No ajak agi 422 tashi lir, anoh tang tasenba nung ken No 450 tashi lir, ken karbo akhidang tanur yimdong kazüdang tenshiba ken dena jana, rüja ajak amongok amai adokogo. Küm ishika lirbo ABAM-i anoh ken kaket tasen ka yanglushia adoktsü dang yongi nisung karbo taruba adok nungjibo nia osang tajung ken kaket revise Committee nungji shimtsüla ta jembitepa alitsü südi. Ashiko Yisu ya yakta arunür sür nung anoh tang tashi asen Aortem Laishiba aser ken kaket koba ang shidak, koba ang meshidak mebentettetba ya agiang atasar südi. Ya junga shisadangra tangar kintem danga taaktsüka, kechiba ta süra asen Aor-i mezüng Yisu yimsü akizüka amangdakja aru asü nungji tangar kintemi anoh tang tashi Aortembo Laishiba aser osang tajung ken kaket ya shidak madokteterana ta bilema alitsü südi.
Anungji joko laishiba aser ken kaket nung ya kangabo tashiba shisangteba ni ashiba ya ang shidak asütsü ta merangteba ya ojang dang süang. Joko Tir yimyim nung Ao ken kaket ta angudang yongi papera mezüngnüi laktetogo. Anoh kechi südir süaka ni mejemba ken yabosa adoktsüla ta masütsüla. Joko Aor laishiba aser ken kaket ya Baazar oset shisihilembaba ka amai mebenshili. Saka tongmelang tamang agi Tsüngremi akizüktettsüsa Laishiba zünga osang tajung kentem dena amanga lidi ta lemsateper.