Anogo 3 tsüngda Maldives Tiri police chief anabuba anentsür

Male, Tsüklai 03 (Agencies) : Tanü Honibarnü Maldives Tiri national police chief ka mapa nungi anentsü; anogo asem tsüngda tan agi tanabenbuba pai police tanishir tekolak mapa nungi anentsür asütsü.
Yimtenren nung ajemdaker puoka alirtem chioktsü aser taoba tir ka densema temulung malem bilemba nisungtem tanaben okadak keno benoka asüngdangyatsü atema Supreme Court-i ozüng agütsüba sülen Maldives nung yimtentren mesüngjemteti aliba mapang ka nung tang Tiri iba mapa inyaker.
Tir Yameen Abdul Gayoom office ajanga ashiba agi, pai Ahmed Saudhee anentsü aser pa melena interim police chief inyaka atatsü asoshi deputy police commissioner, Abdulla Nawaz shimtetogo. Kechiba Saudhee anentsüar iba kuli kecha memetetdaktsü.
Yameen-i Ahamed Areef anentsür anogo ka lir yashi Hokolbarnüang Saudhee ya interim police chief inyaktsü atema shimteta liasü.
Supreme Court-i koba ozüng agütsüogo, iba nungji ajemdaker inyaktsü ta police department-i sangdongba sülen Ahamed Areef -ji anentsü.
Attorney general Mohamed Anil-i ashiba agi, Tir Yameen-i Areef den phone ajanga jembitsü aiben merangdang saka mejembitetba sülen pa anentsü.
Yangtepnü aonung Supreme Court-i ozüng agütsübaji Yameen-i anema nokdaker kechiaser pai ashiba agi, yimten tashi amer alirtemi teka amuoka inyakba ajanga parnokji temeten menguteti tepuokdaki aitsüsa aküm.
Court-i telemtetba agütsüba sülen opposition pusemertemi sorkar dang court-i ashibaji angatsüla ta akhanger.
Yasüng tesü nungi tanep Küptoknü nep tsüngda longkak aitertemji Male yimtiba nung yimten lenirtem puoka aliba tepuokdak tonga arur tangsa parnokji chioktsüla ta takhangba agütsü saka police-i parnokji pakshidaktsü.
Anungji tesem ka nung adenshir parnokji mener longkak ait saka idak nung jagia parnok meindok. Longkak aitba tesem anaprong jagi osang zülurtembo police-i marudaktsü.

You must be logged in to post a comment Login