Anogo shia Coffee marok 3 ajemba tajangzük

Aenjeti 13, 2018: Coffee telatet ka ajemba ajanga temang nung timtem magütsütsü, aser anogo shia coffee marok asem-pezü ajemba ajanga temang nung tajangzük kar agütsütsüa akok, ta tawa British Medical Journal (BMJ) study ajanga bushitetogo.
University of Southampton nung research agirtemi coffee ajemba ajanga meimchir temang nung lenla ajaklen koma kongshir, iba osangji bendena asadanga liasü, aser ibaji study 200 dak tema indanga asdangba ajanga bushitetba lir, ta Hokolbarnü BBC osang ajanga metetdaktsü.
Coffee majemertem den medemdangra, anogoshia coffee marok asem-pezü ajemertem dak temelungjang tashidak balala tajemba aliba mesüra temelungjang tashidak ajanga asür tajemba aliba bushitet, ta kasa study ajanga metetdaktsü.
Coffee ajemba ajanga asen temang nung tajangzük agütsüba tulutibaji- temesen cancer densema temesen tashidak balala nokdangba lir.
Ajisüaka University of Southampton nung medicine department nung faculty aser iba study co-author, Paul Roderick-i, “Arishi küm, moko achiba mesüra machiba aser parnoki exercise agiba kuli balala ajanga yamaji asü südi (tashidak adokba mesüra madokba),” ta jembiba BBC osang ajanga metetdaktsü.
Roderick-isa, “Coffee telatet ka ajemba ajanga tashidaktem nokdanger ama asadangteter,” ta shisem.
Ajisüaka UK nung National Health Services ajanga ashiba agibo, mashisa tetsürtemibo anogo nung caffeine aketba 200 mg dak tali (coffee marok ana dak tali) majemtsüla- kechiyong iba dang nungjagi tali jemra tanur magishii süadoktsüa akok.
Research agirtemisa, coffee ajemertemi shini, mamatzü mesüra cream tali inoker majemtsüla, iba den külemi coffee den temo aketba amtsük/amsang machitsüla.
Source- Internet