ANTA Mkg-i IMDH nung amshitsü atema menden aser tzü filter tenla

Mokokchung, November 18 (TYO): All Nagaland Taxi Association (ANTA) Mokokchung pur “Raising Day” sentong tongmelang ka Honibarnü yangi IMDH Mokokchung nung ayongzüka mungogo.
Iba anogo amungba nüngtem ANTA Mokokchung-i Dr. Imkongliba Memorial District Hospital Mokokchung nung nübur anisüngzüka amentsü atema menden tenet (7) den District Tuberculosis Centre (DTC) nung amshitsü tzü filter ka tenla agütsüogo. Item osettem meshiteta Mokokchung Town Baptist Arogo, Associate Pastor, Yanglu Pongen-i sarasademtsü.
Tanü iba sentong nung IMDH, Medical Superintendent, Dr. Medem-i mapang tatsüka agia jembidang, taxi amshiba maparen nung ya sen tajangzük aikabo mangur, ajisüaka ANTA Mokokchung-i iba ama lokti asoshi tamaren mapa inyakba ngua pelar aser iba yagi nenok dak alima ajungtsü atema bilemba sayur, ta tenüngsang agütsü. Nenoki koba nüngdakba oset balala tenla agütsüogo, iba ajanga nüburtem lenmang aisü nung tajangzük angutsü imlar, ta paisa shisem.
Iba ama telok balalai IMDH ajungkettsü asoshi mapa balala inyakba ajanga yangi inyakertema tali awaa oa inyaktsü tasü itdaktsür aser nübur tenzüktsü jangradaktsür, ta paisa ashi. Mozü ki ka ajungtsübaji nüburtem dak tuluka keta lir, anungji nüburtemi maparen ajak nung amalitepa aotsübaji kanga tenüngdaktsü, ta paisa shisem.
ANTA Mokokchung-i yaküm parnok “raising day” amungba mapang “Keep Your Town Clean” ta sür sticker campaign ka tenzüka tanü tashi merükmejuba maparen balala inyaka arudar. Aji oda, par telok yagi mapang shia lokti asoshi mapa balala inyakba angur. Ano kobi melii nüngdakbapur atema ‘health camp’ ka katsütsü parnok tebilemba aliba ANTA ketdangsürtemi iba osangbener den jembidang lemsatep.