Anü-anüa chiyungba agi tepok tasüngba

London, July 26 (Agencies): Chiyungtsü achidang anü anüa achiba ajanga tepok tasüngba amai aser kara chiyunger dang nungi timba achi amai bilemer, ta bushisüngdang ka ajanga ngutetogo.
Tesüiba mapang bushisüngdang ka ajanga, kara chiyunger dang nungia anü anüa chiyungertem Body Mass Index (BMIs) tajemba alir, ta nguteta liasü, ajisüaka aji kechi asüba agi’ar junga mangateti liasü.
Asenok kara chiyungba ama kara ayar asü masü’ar tendangtsü atema University of Bristol nung bushisüngdangertemi nisung kar nem tube ajang tomato soup tebang nung jemdaktsü, ta Daily Mail osang ajanga ashi.
Iba soup jemdaktsüdang mapang telemsa balala ana nung jemdakja liasü. Mezüng buba nem second pezü tetsüngda lia second ana nung 11.8ml jemdaktsüli ta asü aser tanabuba nem second 10 tetsüngda lia second ka nung 5.4ml jemdaktsüli ta asü.
Iba sülen ghonda ana lir külen shilem agirtem dangji tepok koma asüng amai bilemer, ta asüngdanga liasü.
Kara kara ajemertem dang nungia anü anüa ajemertemi, tejemdak nung aser ghonda ana sülena parnok tepok tasüngba ama bilemer aser talangba mayar, ta ashi.