Ao o zülumen temelenshitsü kar

~ Er. C.Kazükaba Jamir, SDO (Rtd), Naga United Village, Dimapur.

Ao O zülumen asoshi mapang talangka atsütepa arur külen tesüsa 1988 küm Impur nung AKKOR aser ABAM na den S.Mongsen aser Dr.Renthy Keitzar na jaoka Ao O zülumen amshiyim kar (i.e H,Z,S) yamai amshitsü renem (i) H ya tapet ojang ishika dak alaka tanga ojang kecha nunga mamshitsü. (ii) Tzü ta olasü (Pronunciation) adokba ojang ya Engraji nung liquid ta aliba ojang nung dang amshitsü aser tanüngba ajak nung S amshitsü renem. Saka tanü asenoki H, Z, S ya pei amshinütsü dang amshiteper.
1. H ya aikati high tune nung amshiteper. English alphabet nungbo yamaji alitsüa akok, saka Ao alphabet nungbo ibai low tune nung lir. Onokbo middle skul tashi Ao alphabet agi, idangjibo H ya low tune nung liasü. Iba jagi Ao oshi nungbo H agi tenzükba ojangji Ao dictionary nunga, hiki, Hon, hai ta ishika dang angutsü. Kasa O zülu ABCD…….Z ta liaka English agi balaka aser Ao O agi balaka ta olasü adoker. Aji asünung Aoribo Ao O alphabetji jung junga zünger temolung agi akoktsüla. Iba sülenji dang O zülu shia olasü koma adoker yamaji ojangtemji melenshia amshitsüla. Tanü asüng English alphabet zünger külen nungi H ya high tune kümdaktsür aser ojang aika raksayonga odagi. Iba yagi tarutsü nung teraksa tulu bener arutsü ama bilemer.
Aikati temesüktep ojang nung H enokra bendangtsü ama bilemdagi, saka aji tamakoktsü kechiyong item ojangtemji oren (sentence) balala jagi angatettsü. English nunga bank ojang ya sen ayudak, tzüküm aser azü bendendak ta lir, saka bank ta amshiba ajakji pei oren jagi kechi nungdak indang ashir aji angateter. Anungji temesüktep ojangji nai angazüknera ojang nung H dang enoka mekazüi P.Alem Jamiri züluba ‘Ojangrü’ kaket züngang, yangi temesüktep ojang 625 angutsü.
2. Tsü ta adokba olasü nung proper noun nung dang Z enoktsü aser verb ojang nungbo S enoktsü renema lir. Saka tanü asüng abstract noun nunga Z amshidi asür. Iba jagi ojang tetezü kanga meputepi akümer. Tatishitsü tsükong ta amshitsü melen tzükong ta amshiba ya khenyongi tai lir. Kechiyong tzükong ta ajaba ya ali ongmang lemsaba dang dang ajar. Ibai English O nung range ta ajabato lir. Range yabo tzü akongba agi akümba masü. Tzükong ta süra tzü akongba tetezü lir.
Taoba mapang ocet zülur kati tzü akongba agi tzükong ajar ta langzüba nguogo. Ni ibato shidak ta magizüker, kechiyong asen lima tekong tenem/ali ongmang lemsaba dang tsükong ta dang jateper. Tatishitsü Ongpangkong tsükong, Langpangkong tsükong ta dang tetshia arur. Itemibo tzü akongba ali ongmang/tekong tenem masü. Alemli Noa mapangbo tzü agi metsüngpanger alitsüa akok, saka nibo item tsükong ya tzü akongba agi ali ongmang aküm ta jembia mangazük. Kübu kübou nungeria kecha mashi, kaket kecha nunga zülua mangu. Kari kuli tejangja ngua lira rateta ashi nung kanga ajungtsü.
Anungji tzü akongba kuli tejangja melira tang nungibo ali ongmang/tekong tenem lemsaba dangbo TSÜKONG ta dang amshidi arungma. Tang nungibo osang zülur (Journalist), osang adoktsür (Editor) aser ocet zülur ajaki tsükong ta dang amshidaktsüner. Oshi ka tejakleni aotsü asoshi nükmen tulutibaji asenok dak dang keta lir. Asenoki aibelenra asen oshi obenji tesamar ta meteti.
TSÜNGLU – Ibai abstract noun ojang ka lir. Tsünglu nungji tzü dena alinung tzü jibo teka agi kongshitsü akoker. Saka tsünglu nüngja jibo teka agi mekongshitettsü. Abstract noun dang masü saka tzünglu ta züluba ojang yabo olasü junga madokteter. Nibo temeli teküprak/mekiki asüba agi asütsüa akok. Nenokia khen merangdangang. Asenoki ojang züluba nung olasü balala lemsa-a ola adokba dang grammar nung olem ta ajar. Iba olem yagi ojang ka nung olasü koma lemsa-a adoker ibaji sayur. Tatishitsü agi, menonok=Me – nok – nok, Kohima=Ko – hi – ma ta lemsa-a adoker. Yamaji tsünglu=Tsüng – lu ta lemsar. Saka tzünglu=Tzü – ong – lu ta dang lemsateter. Khenyongi tzüng ta madokteter. Nai tzüng ya olem ka kümdaktsünera, Tz-ü-n-g, T-z-ü-n-g ta terben jika azüngdang ne temeli repdaka adoktsü. Iba jagi tzünglu ojangji tai ta kuli agütsür. Saka tsünglu yabo T-s-ü-n-g-l-u, T-s-ü-n-g-l-u ta tenemben züluyongja asen temeli kecha mekangshitsü. Iba jagi sayur tsünglu ta amshi tajungba.
Ano iba ojang aser olasü mesüktepba adokba kasa ojang itemi reprangang. Tsünglu ta ole nana lemsaba ama parnoka ana dang adoker, tsüng-da, tsüng-sü, tsüng-rem. Ano nai akibo item nung Z enoker tzüngda, tzüngsü, Tzüngrem ta amshiner asü? Asenoki S melena Z yamai mashi mashi ojang aika nung amshiba agi tawa tanü lanur aikati pei tenung nunga Z enokyonga odagi. Tatishitsü agi – Tsüknung – Tzüknung, Tsükjem – Tzükjem etc ano aika alitsü. Tsürabur nungo tenung tajung liaka asenoki mebilemdangi tzükong, tzünglu ta melena aoba agi tanü lanuri ibaji shizük! Tesülen ojang aika raksamar külenang tsüngken lai “Tetsüi sayipshi jaja-a sayuba agi onoka yamai dang jajateter” ta langzüba ama akümtsü.
Anungji tzünglu ta amshiba ya tai ta angatetra Ken Kaket aser Laishiba nung amshia alibaji taruba revision nungbo melenshidaktsüner. Tim ta bilemra tang nungibo osang zülur, kaket zülur aser ocet zülur ajaki tsünglu ta dang amshidaktsüner.
ENGRAJI NUNGI MEYIPZÜKBA OJANGTEM ATEMA
Oboula nunger tendak metetshiba/mamshiba oset aika tanü asen lima nung lir. Tatishitsü agi telephone, radio, T.V etc. Item nungja ajakji akok tashi pei oshi nung meyipzüka amshitsü merangdi ta ajaki tejembidak lir. ABAM Literature Board ajanga school ya skul ta asen oshi agi melener amshidagi. Tena ya o zülubo balala, saka olasü kasa aser tetezüa kasa lir. Tsürabur kaket zülur ajaki yamaji dang amshia arudagi. Saka tanü ano English nung school alibaji asen O nunga school ta dang amshidi ta asübaji nibo masüa ta langzür. Sorkar aser tanger kin den zülutepdangbo school ta amshitsü aser asen kaket ke O aser oshi oben nungbo skul ta amshi tajungba asütsü.
Ano tsürabur lai putishir aikati Laishiba nung aliba nisung tenüng aser tapu tenüng ajak Engraji nungi asen Ao oshi agi meyipzükja lir. Ao Laishiba ajak nung English aser Ao O naprongla agüja lir. Item ya Aor dang English nung yamai aliba nungi meyipzükba ta sayurba lir. Aji dang masü English nungjaji metettsü asoshi enoktsüba lir. Saka tanü Aor tenla ki ajak nung sayutsüngir nungi Arogo tenzüker tashi tenla sapang nungi lai tekong aser nisung tenüng ajakji English agi züluba dang agiteta amshir. Aor tenla kidang Aor temeja sentepdakbo asen O temeja agi jembi tajungba masü no? Temalen ocet zülur kati Laishiba nung aliba nisung tenüng yabo asen O nung balaka memeyip nunga jungdisü ta zülua angu, saka ibaji nibo masüa asür. Kechiyong John ta aliba Yohan agi meyipzüka amshibaji kanga junger ta ni bilemer.
SEMPET ASER SENPET BENDANGTSÜ MERANGBA
Ao oshi oben ya ABAM Literature Boardi ketdangsüa ali tashi sempet (Talent) aser senpet (Award) na mebendangi dang meyoktepa amshia aru. Ojang kasa süaka oren balala asünung nebur ajaki mela mela-a angateta aru. Tawa tanü temeteter kari anir jungdisü ta sür senpet aser sempet na bendanga amshitsü merangdagi. Yimdak soa inteter ishakatibo anidakteter, saka tanü bendanglen soa inteter teimba aser temeyok jila nung alir teimba kümogo. Asen oshi jembiteter ajema kümogo, ano asen oshi züngteter aser züluteter ajema kümogo.
Iba ama tensa ka nung ojang ka agi ana lemsar amshitsüji mapa temela masü. Aikati bendanga amshitsü merangdanger, saka meyoktepa tokogo. Ano aikati sempet aser senpet ya mangateti amshidagi. Joko osang zülur, kaket zülur aser ocet zülur aikati mebendangi züluteper. Yamaji mebendangi züluba azüngdang kanga tezü atanger aser otsü aser osangji tajung süaka mezüngnüi akümer. English oshi nunga ojang ka süaka tetezü balala nung amshiba ojang aika lir. Saka pei oren jagi nungdakji odang angateta adoker asünung shinga memangmangteper. Melenshinübaji tim dang, saka neburtemi manidaktetba ji joko anenadoktsüla. Kechiyong kar shia metetba sayunüdang neburtem mangmangteper. Joko asenok purapuji tali moi mezüngpuri koma inyaka/amshia aru yamaji dang anidaktsüla ta nibo bilemer.
TANG ASER DANG AMSHIYIM
Ojang ana ya olasübo kasasa adoker saka grammar form balala nung amshir. Tali rajemtsü asoshi yamai angatetdi. English nung yamai lir – Tang (Now) iba mapang, teinyakdak, Dang (auxiliary verb), verb yariba, soloka amshiba O. Tatishitsü oren – Pa dang tang arung ta shiang. Iba oren nung mezüngbuba dangji auxiliary verb lir, tanga oiang den soloka amshiba aser tanabuba tangji iba mapang (Now) ta ashiba lir. Tang aser dang ojang ana bendanga aser jangja-jangja amshitsü asoshi ni yim yim osang – 08/10/11 aser 12/11/15 nung adokdaktsüogo. Aikati shidak angateta melenshia aruba asoshi kanga pelar. Saka ano osang kaket nung ocet zülur aikati ibai mangateti dang meyoktepa züluba angur. Aji oda tang aser dang mependangi zülua angudang kanga tezü atanger. Ocet nungji otsü aser osang tajung liaka tena mependangi zülua angudang mezüngnüi akümer. Tena ya bendanga memetetra ocetji mezülu tajungba asütsü ta nibo bilemer.
Ano Ao ken No.135 nung kendongji (Heading) – “Pa dang amangang” ta zülua lir. Ken nungji shinübaji “Pa dak dang amangang” ta ashiba angur. Kendong nung “Pa dang amangang” ta alibajibo asenoki nisung kar dang amangang (reported speech) ta shiokba O dang lir. Saka ken agi ashibajibo Tsüngrem aika liaka Yisu dak dang amangang ta ashiba lir. Kenjibo notation agi melaba/toyuba ama ojang teputep shima yanglutsü, saka kendongjibo shidak amshitsüla. Great Hymns of the faith 252 nung “Only Trust Him” ta alibaji asen oshi nungbo “Pa dak dang amangang” ta meyipzüktsüla. English nungbo ojang asem “Only trust him” ta dang lir. Saka asen oshi nungbo dak ya enoksem nungang shidakba tetezüji yangluteter. Dakji tali enok nung dang tetezüji jangjatsür. Dak ya noun den soloka amshiba ojang ka lir. Dak amshiba yagi orenji teindang (direct) kümdaktsür. Ibai meinokra orenji tanger ka ajanga shiokba oren (reported speech) ka dang kümdaktsür. 1990’s tashibo ABAM Literature Boardi dang asen oshi oben ya ketdangsüa aru, saka tanübo parnokiang sung ken kaket nung kendonga junga magütsüteter no ta sasa-a bilemer.
MAKA NUNGI MEKAI TA AKÜMBA
Asen Ao oshi nung negative ojang aika grammar tsütsü tense balala nung amshidang O züluji kar melenshir. Ibaji yamai, kodang negative ojang ka present continuous tense nung amshidir, iba ojang nung tanabuba O zülu A alibaji E agi melemtsü aser ojang tatembang nungji I talila ka bendenloker.
Tatishitsü agi –
Majung – Mejungi
Makok – Mekoki
Maden – Medeni
Maka – Mekai
ta amshia arur. Item yagi oren yamai yanglutsü akok:
1. Majung – Tanübo tsüngsang kanga majung.
Mejungi – Tsüngsang mejungi pa alui ogo.
2. Makok – Parnoki raraji makok.
Mekoki – Rara mekoki parnok meyipa aru.
3. Maden – Pa meeting nung maden.
Medeni – Pa meeting nung medeni oadok.
4. Maka – Pa Kohimai aotsü sen maka.
Mekai – Sen mekai Kohimai motettsü.
Tejaklen tatishitsü agütsüba ojangtem rongnung No.1 – 3 tashibo ajaki shidak amshia arudagi, saka No.4 nung aliba ojangjibo shingaia mekai ta melenshia mamshiteter. Ya kechiba ta aiben nemjema bilemer. Ojang nung olasü adokba ya asenok ajaki terara balala dang adokteter. Aji dang masü lanuwa nungi kechi olasü nung angazük, tai süaka ibaji melenshitsü tasak akümer.
Saka Aor arok ajungtsü asoshi ano khen shisadanger Ao grammari kechi toyur ibaji melenshitet nungbo ta imla-a ibai zülur.
O ZÜLU MELENTEPA AMSHIBA KAR
Aor kaket ken O aser oshi oben asoshi mapang talangka atsütepa arur külen tatem nung Ao Laishiba aser ken kaket nung kechi zülumen amshia ali, ibaji dang agitsü ta renem. Saka reprangang! Tanü O aliba U agi, D nungi T aser P o B na melentepjen melentepa odagi. Item ojang ajak ya olasübo kasasa adoker saka züludang teputep enoka amshir. Aikati olasü junga adoktsü asoshi ta jembir, saka kodanga yamaji mesütettsü, kechiaser aikati alphabet ABCD ya English agi dang zünger Ao O ojang nung olasü tai adoker. Aji asünung Ao oshi junga metetnüra tamasa Ao alphabetji jung-junga züngang. Yamaji asünung dang ojangtem melenshitsü akoktsü. English nungbo zülumen o olasü na meputep aika nung lir.
1. A ya English nung E ta olasü adoker. Saka reprangang! Ojang aika nung Ao O ama A ta adokba angur (That, Alternative, Altitude, Father).
2. Ano A ta aliba ojang aika olasü O ta adoker. Itemi reprangang:
All – Oll
Hall – Holl
Halt – Holt
Ball – Boll.
Yamaji English nungerbo O zülu o olasü na meputep lir. Kechiba A zülur olasübo O ta adoker? English alphabet nungbo A ji E olasü adoker süra Ell, hell, held aser bell ta olasü adoktsü asü?
Yamaji tangar oshi nungbo o zülu den olasü meputep aika lir, saka shingaia memelenshitsür. Ni tanur asüdang yamaji angazük aser tanüa kasa dang lir. Yabo o zülu den olasü adokba na meputep ta English nunger rongnung atsütepa aliba ni mangashi. Parnokbo o zülu den olasü meputepatem dictionary nung olasüji shimekatsü agi meketpanger yuja lir. Asenokia yamaji meinyaktettsü no? kechiba O/U, D/T aser B/P dang melentepa kazüner?
O NUNGI U MELENBA TIMTEM
Ojang koba nungsa O amshia ali, item nungji olasü ajem ajema aser polong polonga adoker. Itemji kodang U agi melendir olasüji ret reta aser arok aroka dang adokteter. Asenoki O aliba ojang ajak U agi melentsü merangba tawa tanübo TO melen TU aser IBATO melen IBATU ta melentsü tenzükdagi. Tarutsü nungbo TO agi tenzükba ajak (Tongpang, Tongshi, Tongnu etc) TU agi melena aotsü südi, idangjibo Ao oshiji temenünütsü ka akümtsü! Aor dak tajitettsü sempet tajung aika keta aliba agi ajiteter südi. Aji dang masü purapuji nunga sempet angutsüa akok. Iba jagi Aor tenung aika Engraji den meyoktepa amshidagi. Tatishitsü – Jungshy, Imthy, Wathy, Emkong, Emna, Juba aser Toshy.
Item ajak ya English alphabet dang meteter asen oshi nung nungja den meyoktepba agi ajaba alitsü. Akok asübo asen lima skul ajak nung asen oshi tenzüka asen o agi alphabet ya angazükdaktsü nungbo Ao kaket ken O aser oshi oben na kanga jungla ta bilemer.
D NUNGI T MELENBA
Ni shisemba ama Aori English alphabet dang angazüker Ao O zülumen melenteptsü merangba agi tanen mekai melenshijen melenshia odagi. Ni ashitsübo itemi kecha nungdak maliba ka lir. Alphabet ya Ao O agi zünga ora D aser T ji olasü level kasa nung dang lir. Anungji level kasa nung aliba O zülu kaji melenshiyongja olasübo kasa dang adok langlang! Yamai D aser T na melentepa mekazü yongja T/D amshiyim dang kar tongmelang agi lateta yutsü nung ajungtsü amai bilemer. Yimya agi asenoki T agi tenzükba ojang ajak T dang amshir. Aji asünung tang amaji dokan, doctor aser dang (auxiliary verb) dak alaka tanga ojang tetenzük ajak nung T dang amshitsüla. Ano tom nung aliba ojangtem koba nungsa TEP ta amshia ali (jashitep, pelatep, sentep aser katep) ajakji yamaji dang amshitsü. Saka koba ojang nungsa TAK ta amshia ali itemjibo DAK agi melentsüla (tashidak, nungdak, watidak aser shishidak). Yamaji tongmelang agi kar melenshira ibaji ajak asoshi kanga ajungtsü ta shidanger.
NÜCHI/NÜJI AMSHIYIM
Ojang anaprongla ya olasübo kasasa adoker, saka tetezü khenyongi balala asünung jembidang aser züludang bendanga amshitsüla. Nüji tetezü – Teburi amshiba nü (Spear) idakji lir ta toyuba. Nüchi tetezü – Senso temeden anguba, nüchiso anguba, peisasa yimsüsütsü yimli anguba, alar tia nungi nüchi akümba ta lir. Anungji tena ya bendanga metettsüla. Ao Senden Literature Boardi renemba Ao oshi temsen yim-1.2010 serial No17 (10) nunga Nuchi – Nüchi tia ka asoshi sarasademang, Nüji – Nok mesüra nüji benang ta oren den yanglur agüja lir. Saka aikati ibai mamshiteter.
Tanü tashi nung osang zülurtemi (Journalist) mamshir. Osang zülurtemibo Ao O temsenyim-1 ya mezüngdang asü koda? Mesüra nenok sasa mamshir? Meeting ajak nung nenok atener aser tongtipang nisung ajak den nenok ajurutepa osang nenoki agütsür, süra nenokibo toyua alibaji shidak amshi nung kanga ajungtsü.
Ao Baptist Arogo Mongdangia Ken Kaket aser Laishiba ajak nung yimden temeden indang ashidang Nüji ta dang enoka lir. Ni tejaklen zülutsüba ama Ao kaket ken O aser oshi oben ya ABAMi ketdangsüa liasü süra iba tashi (Power) to tanübo samaogo na? Aor longjema atenshiba lokti teimbaji Arogo lir aser Arogo ajak madak tashi agütsüsang Ao Mongdang ya lir. Yamai dang lokti ana tsüngda tashi mangatetepi ao nung jungdi ma? Mongdangi tim ta bilemra taruba revision adok nungbo Ken Kaket ase Laishiba ajak nung nüji ta alibaji nüchi agi melendaktsüner.
O TEMBANG : Ao kaket ken O aser oshi oben ya ni kanga meima aliba agi temetongshitsü kar zülutsüogo. Shirnokisa ajemajema mener oren ajak ya süoki yia züngdir, parnoki dang ni shinübaji angatettsü. Shirnoki angateta züngdir parnok asoshibo temoatsü asütsü aser hau ta agizüktsü.
Aori alphabet ya asen Ao O agi mezüngtet tashi ojang ajak pei sünütsü süa dang amshinütsü. Kin ka oshi yamai pongba pongba-a pei melenshinütsü melenshia ora United Nations Educational Sceintific Cultural Organizations ajanga küm 100 tsüngda nung oshi 70-bo samatsü ta shinzüka toktsüba rongnung asen Ao oshia tensemtsü ana nung lir ta kü O yangi atemer.