Aor koleni Aor?

A. Shilu Ozukum, Aoyimkum

Abraham Lincoln-i pa President menden nung mener yimjak nung jembidang, pai iba o ya jembia liasü. Asenok kong lir? Asenok koleni aor? Aji tamasa metetlasang, asenoki kechi inyaktsü aser koda inyaktsü aser koda inyaktsü aji metetla.

1975 küm May nungi 1978 tashi Pastoral mapa nung inyaker tazüngi ao, iba nungi meyipa arur 1979 January nungi CBCNEI nung Christian Literature nung küm 16 inyaker külen, 1995 March nungi tenzüka touring missionary ka ama Naga lima ajak semjema jaja dagi. Tang tashi nung Ao Arogotem 25 to 30 tashi semdangogo. DABA nung Home Evangelist küm 20 shi inyaker sodi nung lir. Asenok ajaki metet Aorji Tsüngremi balaka meimba (Naga nunger rongnungibo) asen Aor dak tangar dang nungi sempet tajungba aika dang lir.
1. Revival 1976 nung adokba Zenith tashi tur aluogo (Aochilak tur ali tonga angamzüka aluba ama asen Ao Arogotem tanela jenjang alur lir).
2. Seminar, bible study agimaogo, susang tambur dang shitu koda mesayu ama ta asübato asen Aor dang ashir, ajak metet saka mapa mali.
3. Laishirtem meyirijang tema Bible college , theological College, 170 shi nung asen Aotsür Aortem lir, tamasa collegei aodangbo 100 degree nung apussotsü, küm 3 or 4 zünger arudangbo tejangrabato 30 to 50 degree nung meyipa arur arogotem nung inyaknüa masü lendi anasa (road side) nung aliba English school-ang ka repranga mesüra züngzüker govt mapa ang ka ita sen teimba agia jangratema alitsüang bushia arur. Nü commitment kong lir, na dedication kong lir, na azüngdang arogotem nungi teyari agia azüngba to bilemdangang, Tsüngremi na nungi akangtsü.
4. Tanü Ao Arogoji kechi agi shiranger, kechi mozü achi nung ajungtsü, koba hospital bener ao nung ajungtsü, iba lenmang bushitsü mapang tongogo. Oboula Dr. Clark aser Godhula babu tenati iba Yisu yimsü osang tajung asen Ao limai bener arur küm 140 shiang saka Arogoto tera akasoa lili, Election ka aruli, tanela jenjang tamang jenjang, zero degree nung anir luagi toktsür, iba atakatem ya shibai abentsü?
5. Yimten yimsüsüba jenjang nunga Tsüngremi asen Aor nem temaba jenjang agütsü., saka tangari asenok sülen manidakli ta asür ya kechi tai ? Ashiko tenük merem agi asütsü akok, saka asenok daka langka taibosa alitsü akok.
Tanü asen Aor tiaji politically, social, economic, culture aser religion nung teraksa, tebenja, teküptep agidang sünga lir, ya koda asütsü. Aorji koleni teptettsü? Ya asenok ajak tebilemtsü masü na? Roman yimli küm 600 tashi merena aliba, alima ajak aramoka yimsü süa aliba kechiba lao, item kuli ajanga laoa liasü.
1. Meimchir loktiliba nung kimongji kibong saka parnoki iba ya merükteta mayu.
2. Sen amshiba nung mekümdang, public senji kija meyong akümba agi, aser sen agi lanurtem mesüzüka yi, temesüpba ocet talubosa agütsüba agi nisungtem yiar ama kümdaktsü.
3. Alimai shi jangraba mapatem nung tali temulung agütsübayong, sports ama aser cinema ama etc
4. Parnok o parnok na tsüngda nung mulung melemtep agi sunga aliba ajanga.
5. Tamangba yimsü raksaa aoba yimsüji tazütsü kadang amshibayong Tsüngrem tanela tatenba parnok den mali asü.
Süra tanü asen ao kin tia :
a. J B Mill-i ashiba ama Aorji selfish pei asoshi dang bilemba agi sunga aliba kin ta shia angutsü. Kechiaser tangar kin 15 sangerjibo parnok o parnok na leptepba mali asü, saka Aorbo Aor o Aor na leptepa a aruba angutsü. Tanü asen Aortem kechi jenjang nung lir, talubosa azükaruba tia nung pei jurila bilemba jenjang nung nokdaka lir.
b. Tejakleni odi ta asünunga lenmang sadema mali, tesüleni atsüngzükdi asünunga tangar dang aaker ta asüba jenjang nung asenok nokdaka lir.
c. Achiyonga koya, machiyonga koya ta asüba amato, tamajung teraksa ajakto tanüngba kin 15 sanger jagi Aor nem dang nemtsür.Adianu tanü Aor koleni Aor?
d. Ni Ao Arogotem sema jaja dang ajitetba agibo asen Aor lokti nung, Arogo nung preaching masü, sermon masü, saka teaching kanga dang nüngdaka kümogo ta ajiteter, sermon, preaching, menüngdak ta mashir saka item ajak dang teaching-ang kanga nüngdaka kümogo.
e. Tatemsa ya ayongzüker, Aoli tekong terok sanger, tulur, takar, tashir, temetetertem ajak dangi tayongzükba ka yamai yoker, tanü asen Aortem koleni aor, Aor identity samaogo, iba ya nisung ka kisüng yanglushiba agi dangbo meperitsü. Anungji Aotsür Aortem asenok Aor koleni aor metettsü merangdi ta ayongzüker.
Tsüngremi tazünger ajak moajangma. Amen.