Aotsür onük nung Tebilemba lemsateper

~   A. Toshi Lkr., Tatar, Akhoya village.

Tir Yimyim adok 274 dated 23rd July 2015 tapak 3 nung Ao Senden office ajanga sangdongba onük nung yangi kü tangatetba ka lemsateper.
Ao Senden Mendenti ajanga koba asen Aoer kija aser lokti tentet ajak dang 23rd July 2015 anogo nung sangdongogo, iba sangdong nung Sl. No. 3 tashiji kanga tongtipang aser asenok ajaki kata mezütoki inyaktsüla, saka para 2 (two) nung tetsür kiyi aoer atema kechi shia lir, idakji tebilemdangtsü kar lir ta bilemer.
Anungji iba ocet nungji kü tebilemba aser ozü yimer inyakyim (Akhoya village) indang lemsateper.
Tetsür ka kodang bendanger kiyi odir yimden anatsü nungi yimsüsür, teputedi kimang senteper tsüzüng ozüng agütsüteper. Iba tsüzüng ozüng nungji par kibong koda jungjunga arishi piyong liyonga aotsü, iba indang sobaliba nung ajemdaker tepur temeten aser tetsür temeten indang aser asü pila tashi inyakyim ajak jembiteper.
Kibong karbo kibong kümli shisa meputep mesüra tenük tasen adoka senshitsüsa akümer. Karbo meketmesüng ajanga senshitsüsa akümer.
Anungji item timtem majurudang jelia libaliro indangji jembia atar.
Item timtem ajak nungi jenokdak asoshi tetsür shiba kiyi aoer la kinüngbo yim nungji kin kidong bushia tebu yima toktsür. Item inyakyim ajakji la taküm ali tashi mesüra tena kibong meraksai ali tashi atema lir.
Tasü nü kin kidongi tenüng abeni arutsü ta jelia shia atar. Tetezü la asoba yimten temeten aser senso temeten la dak nungi magiener ta ashiba temaitsü.
Ano tebuba-i mesüra kimangi sobalibai memelaba mapa tamajung tonglokja maremtettsüsa meketmesüngi inyakra tebushir lir ta asüba temeten asoshi onokbo senso nungi tenüng maitoker. Iba dak alaka la temeten akümlir inyaksangshi ajakji koba nü kiyi ao, iba anogo nungi arishi matem tashi tebuba akhüm nung par sobaliba nung jangratema alitsü.
Asen Aor yimtsüng karibo bendangtsür agia bener aruaka par yimer (tebubar yim) senso temeten magütsür. Ibajia mapang kar nungbo tetsükdak lir ta bilemer.
Ibai Ao Senden lemtetba anema masü, saka tanü tensa den putepba ajak dak ajurutsü asünung akangakanga temzüng ka masü saka tetsüra terabo sadoka litettsüsa, tapet liyim agitetetsüsa lenmang lapokdaktsüner ta ozü yim sobaliba tatishitsü indang lemsateper.

“Tialemta taküm otsü” kaket onsara ajung

Ni Ao kaket aikasa züngogo aser tajangzük tulu angur, anungji Aor kaket zülur ajak dang pelaba metetdaktsiir. Yamaji pelaseta alidang 15/09/2015 anogo Wabong S.Aosungküm Ozükümi züluba kaket ” TIALEMTA TAKÜM OTSÜ ” sayaba osang angashia aritepa kaketji bushia alir azüngtsü tenzük. Kodang ni iba kaket azüng imlaba dang nungi kangasa tajungba liasü. Iba kaket ajanga shisatsü jenti nguogo. Ni bilemet iba kaket yabo odangbo zülu masü, saka Tsüngremi meimchir mulungjang shia nung “Matamabensartem jenjang angatetshidaktsütsü mechi Pai shisatsü balaka agütsür züludaktsü sudi, anungji kaket zülur danga kanga pelaba metetdaktsür aser Tsüngrem tenung asanger. Ano tarutsü nunga asen Aor asoshi kaket tajung aika zülua adoktsü imlar aser yongyaa atar. Aotsür Aor shimokisa iba kaket mezüngi lir yaktasa alia azüngtsü ajungshir. Aser kodang nai iba kaket züngdir naia semloka “Hau” junger ta ashitsü”.
                                                       – Wt. Arenla Imsong