APO Executive Council-i Governing Body metentsür

Dimapur, November 18 (TYO): Angami Public Organization indang Executive Council (EC) rongdak senden ka November 18, 2017 nü ayonga amen.
APO Executive Council (EC) nung WAPO, NAPO, SAPO, CPO, AMK, AGOK, ASA, AYO, ASU, APO indang Governing Body aser sanen luden züngsemtem dena lir.
APO indang Governing Body-i November 11 aser 15 anogotem sangdong agütsübaji meyipa magir aser iba tetuyuba nung ashishitep mesüra temulung malemba kecha mali, kechiyong February 3, 1996 nü APO telemtetba kübok iba sangdong ya agütsü ta tanü senden nung adenertemi bangzünga renemba osang metetdaktsü.
Kija mesüra tebilemtsü abenba sensotemi tebilemba balala lemsatepba ajak onoki akhümtsübur aser pela agizüker. Ajisüaka, asenok kilong nungdang tebilembatemji shiteptsü atema onoki mepishir, ta APO Executive Council (EC)-i metetdaktsü.
Executive Council-i APO dak sendakba telemtetba kechisa agidir, ibaji tatembang asütsü, ta parnokisa shisem.

You must be logged in to post a comment Login