AR-i tiyazü jembir asü !

Nisungtemi tiyazü jembibaji tai aser majung, iba jagi loktiliba menentsür aser alima nung lendong aser takoksa ajurur. Aji oda, tanur tilakati kidang tiyazü jembiba nunga tarutsü atema dena lendong tulu keta lir. Ajisüaka, ano kodang linük mitkartem Assam Rifles ama sepaitemi kodang nisung apuba indang tiyazü jembidir ajisa majungba, kechiyong idakjibo nisung taküm kong samar memeteti samatsü tashi lendong keta lir. Ibaji ajak asoshi tetsübutsüka aser shisabolutsüka lir. Aji oda, Kohima nung Assam Rifles purtemi NSCN-K Town Commander Kisheto Ayeh August 3, 2015 nü Kohima nung apu ta August 14 nü sangdongba osangji par kinungertemi tiyazü ta metetdaktsübaji taoksatsüka lir. Par kinungertemi ashiba agi, Kisheto Ayeh-ji August 3 nü Assam Rifles purtemi ashiba tesem nungji masü saka July 31 nü Zunheboto district kübok Sukhalu yimtak aonung 7:30 ako meta apu aser iba mapang pa ket nung prangpong injang kecha bena mali asü. Ajisüaka, Assam Rifles purtemi ashiba agibo Kishetoji August 3 nü Kohima anasa Tsiesena Basa ta ajaba tesem ka nung apu aser pa apuba mapang pa ket nung pistol den injang dena liasü. Aji oda, kinungertemi ashiba o den Assam Rifles-i ashiba oji medemdangra kenyongi balala lir. Ibaji odang angashir yutsütsülabo masü, kechiyong iba ama mapa nungji Naga nunger ajak asoshi lendong tulu keta lir.Tanübo ibaji NSCN-K pur Kisheto dak ataloker saka asüng asenok rongnung shiba dak ataloktsüar memetet. Tang ama tensa mapang ka nung Assam Rifles purtemi NSCN-K pur apubaji tim dang lir, kechiyong parnokji tsükchiteper. Ajisüaka, Kisheto’er kinungertemi ashibaji shitak süra Assam Rifles purtemi tiyazü kuli aika agi Kishetoji aitsüogo ta angatetter. Par kinungertemi ashibaji shitak süra, paji July 31 nü apu aser hopta ana songtema Assam Rifles pur ket nung yur külenang pa apuba anogo, tesem aser tensa tia indangji tiyazü metetdaktsü. Aji oda, Kishetoer kinüngertemi ashibaji shitak süra Assam Rifles purtemi nisung tsüngdang dang masü saka Tsüngrem tsüngdanga tai menaogo aser alima meimchir temeten ozüng anema inyakogo. Iba yabosa bushisüngdang tenzüktsüla. Tanga state nung amato Nagaland nunga State Human Rights Commission alinungbo iba osang ya osangkaket nung adokba den külemi, shingaia longkak aita makangyonga bushisüngdang tenzüker lila aser Assam Rifle purtemjia tai asü shitakar obendang shitak ngutetla. Linük nung ajak atema temaba jenjang nung National Human Rights Commission lir aser state shia nung pei sasep nung sensosangertemi pei temeten meteta timi alitsü aser senso ka temeten shinga nema mezüngmeshi mesüdaktsüi kümzüka ayutsü asoshi State Human Right Commission lir. Tang tashi Nagaland nung iba State Human Rights Commission metenzüki aliba ajanga tang dang masü saka tarutsü anogotem nunga Naga nunger senso temeten anema sepaitemi mashimashi inyaktsü lenmang sadema lir. Odanga, Nagaland ajunga ya Armed Forces (Special) Power Act nung lir, anungji sepaitemi asenok dak temulung malem bilemba kija agi asenok mezüngmeshia mashimashi benshitsü aser tang amai iba anemaji jembitsür shinga malitsü. Aji oda, tang dang masü saka tawa Phek district nung kaketshir ana tashi khasettsüsa sepaitemi inyaker meinyaka ta shitetba sepaitemi Naga nunger shinga mapayui inyaktsü. Linük nung state shia nung Human Right Commission ayutsü latettsübaji yunüra ayutsü,meyunüra mayutsü ta masü, saka ayutsübasa, kechiyong ibaji ozüng lir. Ibaji state Information Commission ayuba amai asütsü. Tangbo Assam Rifles purtemi tiyazü jembir asü mesüra Kishetoer kinungertemi tiyazü jembiar ashitsü makoker, kechiyong kuli maka parnok tsüngda obendangtsütsü tasak. Iba ama nisung temeten anema inyakba mapajibosa state sorkari bushitsüla aser iba ama tatalokba ya atalokpet ataloktsü alinungji tangsa State Human Rights Commission shimtsüla.