Asenok tenem nungi alutsüla

Kenü anogo Tsüngremi Horeb nung Israel nungertem dang ashi, “nenok iba tenem nung lishia liogo, anungji aramesoang…,” Tazüngkunem 1:7. Tetezü, Tsüngremi Israel nungertem iba tenem nungji mapang talangka anisüngzüka lidaktsür liasü ta angatetter. Iba mapang Isarel nungertem ya Ijip nungi alar tia toktsür küm lir buba nung Yordan ayong anüdoklen Moab lisem lima anenzüka liasü . Tetezü, Israel nungertem ya joko Tsüngremi parnok tsürabur Abraham, Isak aser Yakob nungertem dang nangzükba Kanan lima atongtsü anasa dang liasü. Joko, parnok ya Ijip lima nungi pilar küm lir buba ita terkabuba abensar liasü. Küm 40 buba nung Horeb nungi tatsüka dang pilar oagiji par tsüraburtem dang nangzükba mamatsü aser ninang mojitsü agi asüngba alimaji lir ta Israel nungertemibo mejangjai liasü südi. Aji oda, parnok nem agütsüba limaji matongyonga Israel nungertemji Horeb tenem nungji jangratema liasü. Ibayongji, parnoki iba tenemji toktsür tangleni aotsü tebilema mebilem. Ajisüaka, Tsüngremi parnok teti alitsü atema yanglutsüba limaji iba tenemji masü liasü. Atangji, taoba küm 40 shi Ijip nungi Horeb lima atongba tashi nunga parnoki tashi mangaba agi timtem tuoshi, tamakok aser tasüba aika ajuruogo aser ano, Tsüngremi parnok nem takoka aika agütsüogo. Ajisüaka, parnok asoshi timtem aser temoatsü mapangtemji aji tatem masü. Parnok jakdang ano takok aser temoatsü aika yuja liasü. Aji oda, Tsüngremi Horeb tenem nungi Israel nungertem piladaktsünüba nükjidongji item takoktemji ajangshir külen Kanan lima temoatsütemji agia jangratema lidaktsünüa liasü. Isreal nungertem asoshi Tsüngremer nükjidongji Horeb tenem nung aliba jangratemtsü dang nungibo tajungba aser jangratatemba alitsüsa yangluja liasü. Israel nungertem dak atalokba otsü ya mesüka, tanüa asenok taküm aser kibong nung aiben ataloker. Asenok kecha makaba taküm aser tepetzük kibong tia nungi Tsüngremi asenok aniteta asenok anisüngzüka lidaktsür. Idangji asenok kecha shisabolu maka takarba aser tulurba akümer. Iba ama mapang nung asenok taküm aser kibong nung kecha shisabolu maka ayongayonga alir. Iba dang nung jagi tajungba aser temaba jenjangbo mali ama asenoki bilemer. Aji oda, iba ama tia nung asenok teti alitsü ama asenoki bilema alitsüa akok.Ajisüaka, asen taküm aser kibong atema yutsüba Tsüngremer sentongjibo ibaji dang masütsüa akok. Asenok jangratema aliba tia nung jagi alur asenoki reprangdangra asenoki yaritettsüsa asen meketa teyari nüngdakba purtem jenti angutsü. Aji oda, nenok kija atema bilema nenoka jangratema lishia liogo, anungji tanübo aramesoang ta Tsüngremi asenok dang ashir asütsüa akok. Kodang asenoki asenok kija anisüngzüka aliba jenjangji toktsür aramesoa orr tangar nüngdakba purtem yaritsü tenzükdir, atangji timtema ajurutsüa akok, saka iba sülenang shitakba Tsüngremi asen nem yutsüba temoatsüji angutsü. Asenoki teti revival sentong nung dang jangratema kentena Tsüngrem o angaa liner. Asenoki ayongaayonga sentep ki tajung nung mener sayutsüngir tajungi jembiba Tsüngrem o angapet angaa dang liner. Asenoki arogo tajung nung dang Tsüngrema tenzüka liner. Itemji dang Tsüngremi mulungba mapa inyaker amato asenoki bilemer. Ajisüaka, Tsüngremi asenok yamaji jangratema yutsübaji, ashiko asen jakdang asenoki ajanga aotsüba alima tongpang anema raratsü renemtsür asütsüa akok. Peter, Yohan aser Yakob par asemia tenem nung dang linü, anungji parnoki Yisu dang yangji alitsüsa ki yangludi ta asüngdang. Ajisüaka, parnokji tenem nung alitsü shimtetba purtem masü saka luagi lenden nung shiranger aneptsütsü, temenen tanüla agi pua alirtem jungtsütsü aser nübortem dang Tsüngrem yimli aser Pa temeim indang kuli asütsü atema shimtetba purtem liasü. Tanüa asenoki Tsüngrem dang teti jangratema alitsüba tenem nungji dang alitsü asüngdanger. Ajisüaka, tenem nungji lia asenoki Tsüngremer nükjidong mataloktsütettsüa akok. Asenoki metetba aser asenok akaba nungi asenok ajemalutsüla aser Tsüngremi mulungba inyaktsü apusotsüla.