Asenoki lenmanga meyanglutetter

Asenok asoshi pei lima nung pei mapa agi nümamedangtettsüsa anogo shia ajuruba tia kaji gari lenmang majungba ya ka lir. Lenmang yabo yimkong arok rongsen, anungji lenmang majungba yabo yimkong majung asütsü. Aji oda, asenoki asenoksasa asenok tajung ama jembia alitsüa akok saka asenok ajung majungji asenoki jembiba agi masü saka  asenok mapa agi sayutsü. Talisa, asenok yimten lenirtemi jembiba angadangra, Nagaland nung gari lenmang ajak tajung dang  asütsüla amato bilemtsüsa lir. Ajisüaka, tang Lotha aser Rengma nungertemi parnok lushi ajangba senzüba gari lenmang kangasa majung raksaa aoba meyanglushii mapang talangka toktsüba ajanga tejashi sayua nokdangtsü apusobaji tim dang lir. Parnokji dang masü saka ano külen Mon -Namtola lenmanga majungba agi Konyak Union-i Mon district nung adoker MLA-tem dang October 20 tashi nung Mon lenmang meyangluba kuliji meshia takangba agüja lir. Kohima-Wokha aser Mon-Namtola lenmang kibur mali amai yutsüba ajanga lokti tentettemi ola adokbaji aremer maremtet ola adoker ta yimten yimsüsürtemi angatettsüla. Item lokti tentettem jagi ola adoker dang ashi, ano lenmang majungyonga ola madoki arema jajartemji Changtongya-Longleng, Mokokchung -Tuensang aser Dimapur-Jalukie lenmangtem ama nung anogo shia senzürtem asütsü. Atangji, osang tajung kaji tanü asüngbo town-tem yimdong dang nungibo yimtsüng yimdongang tajungba angur. Aji oda, yimtsüng aika nung black topping aser cement agi lenmang kanga junga yanglua lir saka town-tem lenmangbo kanga mejungi raksar teyanglur mali angutsü. Town-tem rongnungsa süaka asenok dang masü saka bendangertem anogo shia jajaba lenmang Kohima aser Dimapur yimti yimdongsa tamajungba raksar lir. Ano, Dimapur nung balaka Signal lenmang, Burma camp lenmang aser Nagarjan lenmang amabo tetsür temang mazünger aser shilumanemertembo senzütsüla masü kanga mejungi raksaa lir. Joko, Nagaland state kümer küm 50 dak tali aoer saka asenoksasa asenok jajatsü lenmanga meyanglutetter. Tang tashibo asenok kolok aser mulungsentsü nung Delhi nungi yokba sen akok tashi mapa meinyaki achitsü bilemer. Iba tangatetba tamajung ya tama melenshitsüla. Gari lenmang yanglutsübo mapang agitsüa akok saka asenok tangatetba melenshitsübo mapang magitsü. Aji oda, lenmang yangluaka minister-ba dak, engineer-ba dak, contractor-ba dak aser nübortem dak pei lima meimba shisatsü melira lenmangji tilaka ser apua apua yanglutsü, anungji ita anasemka nung raksatsü. Sen kijai alima merenloker saka nübortem dak pei lima meimba shisatsü aliba agidang alimaji topur junga renloker. Asen lima asoshi tia majung, asenok ajaki sen dang bushir saka pei lima topur junga ayutsübo mebilemer. Iba jagi yimkong atema terenlok mapa inyaktsü aruba sen agi yimkong ajungtsü mapa kecha meinyak asenoki asen kija agitsü asoshi agizüka agir. Tanü iba jagi asen lima nung gari lenmang majung nübortem timtemdaktsür. Atangji, yimkong jajaba lenmang mejungaka, asenokbo takar kümogo. Ajisüaka, idakji kecha jangratemtsü mali. Asen kidang nungi gari tajung nung mener lenmang tamajung nung senzütsübaji asenok asoshi maksü mapa tuluka lir ta bilemtsüla. Ibaji asenoki akseta mebilemra asenok nüji masü, anungji asen lima merenloktsü. Lenmang majung ser gari tajung nung senzütsü agibo, lenmang tajung nung tetsüng agi jaja tajungba. Iba tangatetba nung yimten yimsüsür aser ketdangsertemi inyakra, asen lima aser asen jajaba lenmang agi asenok nümadangteta alitsü. Alima nung nisung ajak asoshi tepela tulutibaji pei mapa agi pei nümadangteta aliba taküm asütsü. Iba ama jenjang kaji ajangzüktettsü atema asenoki ochishia alitsüla aser pei atema dang mebilemi pei lima aser nübortem ajungtsü asoshi meranga aser nendaka inyaktsüla.