Asenoki Shishilemba Ashitsüla

– S. T. Yapang. Lkr. Kohima.

Tanü lima ya chiyungtsü aser osettsüset alitsü tebilemtsü masü, saka aseni yangluba, tsünütetba ayoktsü asoshi tebilemtsü aliba lima ka lir.
Küm ishika tejaklen nungi tenzüka asen Ao lima tesem aika nung paar (Weekly) bazaar lapokyonga odaki, ano timba dang aotsü nükla nung angur.
Item rongnung Changtongya Town nung lapokba ya tejen aser tulutem rongnung ka asütsü südi. Aikati ashir, “Changtongya Town nung Honibar bazaar atuba ajanga Honibar shia Tzümartemi sen lakh aika bener alur.” Saka item pur jagi asenoki ayokba indang kodanga meshisadanger. Changtongya Town nungi shishiba temer Tzümartemi motoklashi, chiro aser iba amala aonsotsü tapu balala talongtsü sünga alia bener alur.
Iba bazaar nung liso nisüngtemi pei lu nung züsentetba chiyungtsütem tesem balaka nung ayokba angutsü: Nübang, moyarlikok, züngi, menti aser arem süngulio amala temeket alir yimtsüngtem nungi timba bener arua ayoker. Ano Phom lima nungia parnoki züsentetba bener adoka ayoker, aser meyipa taoi parnok nüngtakbatem shishia bener air.
Medemer A.Puna Rato ajanga ashiba agi, “Tamalenbo chiro aser motoklashi (Pear) ya Changtongya litsü nung kanga lalushiponga liasü, saka tawa tanübo Tzümartemi ajak alimar/alizüker asünung ajak sen akümer. Talisa chirbo Tzümartemi alu tashi talongtsü bener talii arur. Iba yongji iba bazaar kanga tongtibang kümogo. Iba shishidaki arur temeket yimtsüngtem nungi timbaka teka tazüng marur, peia tayoktsü bener arur. Itemji yoker ano Tzümartemi bener atuba süngu, ngashi, metsü, mersü alia bener aor.”
Temetettsü tatishitsü ka: Iba amala shishilembadak asenoki Tzümartemi bener atuba sümok tulu sen tera talangba agi alir; kechiyong ibaji amshitsü temela aser tanük, saka Tzümartemi parnoki bener atuba sümok yoktoker asenoki tsünüba sümok tilala sen tera tasakba ta yoka alibatem alidena bener alur; kechiyong itemjibo mozü meinok tsünüba lir. Tzümari bener atubaji ajak mozü ajanga tsünüba dang, aji asünung asen nisüngi tsünütetba koba mozü meinokba lir, item ya alia achiba ajanga asenok temang nung timtem magütsütsü südi aser iba amala bazaar lapokba ajanga asen nisünga aluyimba nung tetsükdaktsü malui tejakleni dang aotsü. Akokba tashi asen nisungi tsünütetba chiyungtsütem alia achitsü merangtsüla aser manguba chiyungtsütem dang Tzümar indangji alia achitsü yimya sübatsüla.
Iba amala paar nung anogo ka alakteta kidang mungtepba ya kaa itta alirtem ashibo kecha tetsükdaktsü malitsü, saka sensaker ayangi aoba agi chiyunga alirtem asoshibo paar nung anogo ka tapok apar; kechiba süra alu/mapa kiburji bazaar-i aotsü alinung iba anogo ya yimdak/jila nung ki asürtem dak alak among adena oa mapa inyaktsüba maparen timbaka anendaka ayur.
Tir Yimyim Yimobilem April 14/2015 nunga Yimozüluri kanga junga shia lir. Oda tayoker ajak Tzümar aser talir ajak asen nisung ta asütsü atemabo kechi bazaar südir süaka majung. Tanü asen lima lanur ajaki tzüma lima nung senzütettsü, anungji kongsa paar bazaar lapoka mali item yimtsüng/tesem nungji yakta lanur telok bangjemer shishilemba tenzüktsüla, ajimesüra tzümartemi item tapokji ngur arutsü.