Asetkong linük, Tuvalu tuluba kümdar

Wellington, Tsüklai 09 (Agencies) : Pacific tzüyim tzüpak nung kümteta aliba asetkong linük tenüng agi Tuvalu linük ya alima tzümopung melenshiba ajanga samaa aotsü südi ta temulung malem bilema liasü saka atangji nungbo tang tuluba kümdar, ta tawa agiba research ja ajanga kuli ngutetogo.
University of Auckland nungi telok kati Tuvalu asetkong linük ya anünglen nungi noksa agia aser satellite amshia kuli bushia liasü.
Tzü wanga atubajibo tanga linüktem dang nungi talangba süaka parnoki bushiba mapang asetkongji asemsü nung ka (three-quarters) agi tuluba kümdar ta jangjaogo. Tanü Rogonü Nature Communications journal ajanga koba research indang sangdongogo, iba research nung Co-author Paul Kench-i ashiba agi, tzüyim wanga atuba ajanga iba asetkong linük moubangtsü ta bilembaji masüa ta tokteptettsüsa parnoki kuli nguteta lir.
“Pacific tzüyim nung tzü wanga atur asünung, nemzüka aliba ali takongji tzü agi moubangtsü ta asenoki bilemer dang ashi, idakji aliba asetkongtemji mesamatsü kechiaser tanen makai tuluba küma melenshidar,” ta paisa metetdaktsü.