Asian Boxing Championships nung Mary Kom semifinal tongogo

Ho Chi Minh City, November 4 (Agencies): Asian women’s Boxing Championships nung MC Mary Kom-i anir kanga junga asayadar, aser la iba asayamung nung medal trok buba angutsü asoshi jangjaogo. Mary Kom den tanü India tsürtem parnok ana semifinals-i iogo.
Semifinal-i aiba asayartem rongnung Mary Kom den Shiksha (54kg) aser Priyanka Chaudhary (60kg) na dena lir.
Mary Kom-i world champion ponguben den Olympic nunga bronze-medal ka koka lir, aser lai quarterfinals asaya nung Chinese Taipei tsür Meng-Chieh Pin koka light flyweight (48kg) jenjang nung semifinal tongtetogo.
Arishi küm 34 tain asayar yagi iba asayamung nung gold medal pezüben aser silver medal khen ta kokteta lir, aser la taruba asaya Japan tsür Tsubasa Komura den asayatsü.
Shiksha shiba Railways Sports Promotion Board atema asayar, la Uzbekistan tsür Ferangiz Khoshimova den asayaa liasü. National champion yagi tetenzük nungi attack süa asaya aser la den asayarnem meyiper la attack asütsü asoshi maongka magütsü-i lai iba asasya akok.
Shiksha semifinals nung Chinese Taipei tsür Lin Yu-Ting den asayatsü.
Maneni tanü asaya nungsa Priyanka-ia Sri Lanka tsür Dulanjani Lankapurayalage den asayaba 5-0 agi kokogo
Ajisüaka world championships silver-medallist Saweety Boora (75kg) Olympic bronze-medallist Li Qian-i tsükdaktsüogo.
Kasa mapang nung MC Mary Kom Guwahati nung November 19 nungi 26 tashi asayatsü aliba, AIBA Women’s Youth World Championships atema ambassador shimogo.
“2017 Women’s Youth World Championships nung Ambassador ka ama shimba ya tetushi ulura,” ta arishi küm 34 tain Manipur tsürla yagi ashi.
Iba tetoktepba ya Guwahati, Nabin Chandra Bordoloi AC Indoor Hall, Boxing Pavilion nung asayatsü.