Asian boxing nung Mary Kom o Sonia na final-i iogo

Ho Chi Minh City November 7 (Agencies): Tang tasayadak Asian Championships nung M C Mary Kom (48kg)-i semifinal asaya koka Sonia Lather (57kg) den final tongtetogo, aser gold medal pongububa koktettsü asoshi maongka ngutetogo. Kasa mapang nung tanü asaya nung tangar asayar pongui bronze medal koktetogo.
Taoba mapang nung world champion L Sarita Devi (64kg), Priyanka Chaudhary (60kg), Lovlina Borgohain (69kg), Seema Punia (+81kg) aser Shiksha (54kg) nunger semifinal nung pei tata asaya makokba sülen bronze medal dang ngutet.
Tanü semifinal asaya nung Mary Kom-i Japan tsür Tsubasa Komura 5-0 agi koka iba asayamung nung final pongubenbuba tongtetogo.
La asüng final asaya North Korea tsür Kim Hyang Mi den asayatsü, shibai Mongolia tsür Nandintsetseg Myagmardulam tsükdaktsü. Mary-i iba final kokra lai tang mezüngbuba 48kg category nung gold medal kokteter asütsü.
“Iba medal ya kü asoshi ni tanga mapang nung kokteta aliba medal den kasa tongtibang lir, kechiyong item medal koktetba ajak dak otsü kaka sendaka lir,” ta Mary Kom-i osangbenertem dang ashi.
“Ni final asayatsü asoshi maongka ngutetba atema kanga pelar. Ni iba asaya kanga toktepa asayatsü ta bilem, saka ni asaya nung kanga kera kera Komura asaya yimya lazükadok. Ni final asayatsü asoshi yongyar saka iba atema kanga bilema kü sasa temilemtsü mebendenloktsü merangtsü,” ta laisa ashi.
Arishi küm 35 tain Rajya Sabha MP shibai taoba mapang nunga Olympic bronze-medal kokteta lir, la 51 kg category nung küm pongu tashi toktepa arur tang lai sapuba weight category nung asayar.
Kasa mapang nung India tsür rongnungi asayar Sonia-ia Yodgoroy Mirzaeva den semifinal asaya koka final tongtetogo. La final nung China tsür Yin Junhua den asayatsü.