Asian Games nung takok angurtem, 2020 Tokyo Olympics nung indang indanga shilem agitsü

New Delhi, Tsuklai 14 (Agencies): Jakarta nung taruba Asian Games asayamung nung tennis asayartem atema iba asayamung nung takok angutsüba atema dang asayatsüba masü saka 2020 Tokyo Olympics nung indang indanga shilem agitsü asoshi asayatsü nüngdaker.
Tennis asaya atema Tokyo 2020 Qualification System nung shilem ka ama Rasemnü (Wednesday) ITF (International Tennis Federation)-i continent trok nung qualification asayatsüba sangdongogo aser iba ya IOC (International Olympic Committee) Executive Board-i temelaba agütsüogo.
2020 Olympic asayamung nung tennis asaya telemsa pungo alitsü; tebur kija aser tarep asaya, tetsür kija aser tarep asaya aser tarep temeyoktep asaya alitsü.
Single draw atema asayar 64 alitsü aser linük shia nungi tennis asayar timba agi pezü dang asayatettsü.
Ajisüaka, 2020 Aami (June) tashi nung asayartem indang single ranking ajak top 300 tsüngda alitsüla.
“Continental Qualification atema tesem shimtetba ya kanga tongtibang lir aser temelenshi ajanga asayar aikati regional games nung shilem agitsü aser Olympic tennis asayamung nung linük talila bendenloka asayatsü asoshi maongka angutsü, ” ta ITF nung Tir, David Haggerty-i ashi.
Maneni, North aser South American continent atema, 2019 Peru nung ‘Pan American Games’ asaya nung tennis asayartem tendangtsü. Iba asaya nung final tongteta asayartem ajak qualify asutsü.
African continent atema, Zambia nung 2019 African Games asayba mapang tanga continent nung ama kasa yimya nung asayartem shimtettsü.